پارێزگاری هەولێر رایگەیاند، رووداوەکانی شەوی رابردوو پێمان دەڵێت، هەندێک بۆشایی ئەمنیی هەیە کە تەنها بە هەماهەنگی نێوان حکومەتی هەرێم و حکومەتی فیدڕاڵی دەتوانرێت ئەو بۆشاییە پڕبکرێتەوە.
ئومێد خۆشناو پارێزگاری هەولێر بە تۆڕی هەواڵی ژیانی راگەیاند، هێرشەکانی شەوی رابردوو بۆ سەر فڕۆکەخانەی نێودەوڵەتی هەولێر و بنکەیەکی سەربازی تورکیا لە باشیک، پێمان دەڵێت هەندێک بۆشایی ئەمنی هەیە کە تەنها بەهەماهەنگی نێوان هەردوو حکومەتی هەرێمی کوردستان و بەغدا، دەتوانرێت ئەو بۆشاییە پڕبکرێتەوە و هێزە ئەمنییەکان باشتر ڕۆڵی خۆیان بگێڕن و پارێزگاری لە سەلامەتی هاوڵاتیان بکەن.
ئاماژەی بەوەشکرد، پێویستە کێشەی ئەو سنورانەی کە لە نێوان هەرێمی کوردستان و بەغدا هەیە، لە چوارچێوەی دەستوردا چارەسەر بکرێن.
پارێزگاری هەولێر راشیگەیاند، "هیوادارین ڕێککەوتنی شنگال جێبەجێبکرێت و پێشمەرگەش بگەڕێتەوە بۆ ئەو سنورانە بۆئەوەی ئاسایشی ناوچەکە بپارێزن".
کاتژمێر 9:45 خولەکی شەوی رابردوو هێرشکرایە سەر فڕۆکەخانەی نێودەوڵەتی هەولێر و پاش چەند خولەکێک لەو هێرشە، چوار موشەک ئاڕاستەی بنکەیەکی سەربازی تورکیا لە باشیک کران .
دواتر وەزارەتی ناوخۆی حکومەتی هەرێمی کوردستان لە راگەیەندراوێکدا بڵاویکردەوە، "دوای لێکۆڵینەوە و بەداواداچوونی دەزگا پەیوەندیدارەکان بۆ هۆکاری تەقینەوەی ئەمشەوی فڕۆکەخانەی نێودەوڵەتی هەولێر، لە ئەنجامدا دەرکەوت کە هێرشەکە بەڕێگەی درۆنی TNTکراو بووە و ئاراستەی بنکەی هێزەکانی هاوپەیمانان کراوە لە ناو فڕۆکەخانە ".
ئاماژەی بەوەشکرد، هێرشەکە زیانی گیانی نەبووە و تەنها زیانی ماددی بەر باڵاخانەیەک کەوتووە .
وەزارەتی ناوخۆی حکومەتی هەرێمی کوردستان راشیگەیاند، لێکۆڵینەوەکانیان بەردەوامن بۆ دیاریکردنی سەرچاوە و شوینی هاتنی فڕۆکە بێفڕۆکەوانەکە.