بوومەلەرزەیەکی بەهێز بە گوڕی ٥.٥ پلەی رێختەر شاری ئەدەنەی باشووری تورکیا هەژاند.
سەرۆکایەتیی کارەساتی لەناکاو و فریاگوزاریی تورکیا - ئافاد رایگەیاند، کاژێر ٠٨:٤٤ خولەکی بەیانی ئەمڕۆ سێشەممە ٢٥ـی تەممووزی ٢٠٢٣، بوومەلەرزەیەک بەگوڕی ٥.٥ پلەی رێختەر لە شارۆچکەی کۆزان-ی سەر بە پارێزگای ئادانا تۆمارکراوە.
لە راگەیەندراوەکەی ئافاددا ئەوەش خراوەتەڕوو، چەقی بوومەلەرزەکە قەزای کۆزانی سەر بە پارێزگای ئەدەنە بووە و بە قووڵایی ١١.٢٧ کیلۆمەتر لە ژێر توێکلی زەویدا روویداوە.
تا ئێستا سەرۆکایەتی ئیدارەدانی کارەسات و باری لەناکاو لە تورکیا – ئافاد و حکومەتی ئەو وڵاتە هیچ زانیارییەکان لەبارەی زیانەکانی بوومەلەرزەکە نەخستووەتەڕوو.
ئەمەش لەکاتێکدایە، دوای ئەو زنجیرە بومەلەرزانەی لە ٦ی شوباتی ئەمساڵ لە تورکیا و سووریا روویاندا پاشەلەرزەکان بەردەوامن.