سەباح سوبحی، ئەندامی لیژنەی نەوت و غاز لە پەرلەمانی عێراق رایگەیاند، "هەفتەی داهاتوو خوێندنەوەی یەکەم و دووەم بۆ پرۆژە یاسای هەناردەکردنەوەی نەوت، لە پەرلەمانی عێراق دەکرێت، رەنگە لایەنەکانی شیعە بە هەندێ مەرج لەگەڵمان ڕێک بکەون بۆ تێپەڕاندنی پرۆژە یاسای هەناردەکردنەوەی نەوت".

ئاماژەی بەوەشداوە، "بەربەستی سەرەکی هەناردەکردنەوەی نەوت مادەی (١٢) بوو لە یاسای بودجە ژمارە(١٣) ساڵی(٢٠٢٣)، بڕگەی دووەمی ئەو مادەیە لە بڕگەی (ج)، باس لەوە دەکات پرسی بەرهەمهێنان و گواستنەوە، یەکسانە بە تێچووی بەرهەمهێنان و گواستنەوە لە وەزارەتی نەوتی فیدراڵ.

باسی لەوەشکردوە، "ئەوە وایکرد تەواوی بەرهەمهێنان و گواستنەوەی نەوتەکە، پشت ببەستێت بە هەمان خەملاندنی وەزارەتی نەوتی فیدراڵ بۆ هەموو کێلگەکانی عێراق، بەپێی خەملاندنی وەزارەتی نەوتی فیدراڵ، دەرهێنانی نەوت لە عێراق، نزیکەی (٨ بۆ ٩)هەزار دیناری تێدەچێت، گواستنەوەش (١.٢)دۆلاری تێدەچێت، بەو شێوازەش مامەڵە لەگەڵ هەموو کۆمپانیاکانی نەوت دەکەن.

ئەو پەرلەمانتارە ئەوەشی خستەوەتە روو، 'پێشهاتە نێودەوڵەتییەکان وا دەردەخات کەنداوی عەرەبی لە مەترسیدایە، مەترسییەکەش لەوەدایە لەهەر حاڵەتێک دۆخێک بێتەوە پێشەوە، ئەو دەروازەیە دادەخرێت، یەک دەروازە هەیە بۆ عێراق بۆ هەناردەکردنی نەوت کە بەسرەیە، لە سەدا(٩٥)ـی ئابوری عێراقیش لەسەر نەوتە، عێراق بەدوای دەروازەیەکی دیکەدا دەگەڕێت بۆ هەناردەکردنی نەوت، بۆ ئەوەش دەروازەی حەدیسەی هەیە کە چەندین ساڵە هەوڵ بۆ دروستکردنی بۆریەکە دەدات و(٢)ملیار دۆلاری بۆ پرۆژەکە تەرخانکردووە"
 
وتیشی، "رۆژانە عێراق نزیکە(٣)ملیۆن و(٥٠٠)هەزار بەرمیل هەناردە دەکات، ئەگەر ئەو بڕە نەوتە لە هەناردەکردن بووەستێ کارەسات ڕوو دەدات، فشار لەسەر حکومەتی فیدراڵ هەیە ئەو کێشەیە چارەسەر بکات بەر لە هاتنی وەرزی زستان لە ئەوروپا، لەبەر ئەوەی زۆر وڵات هەیە دووچاری قەیران دەبێت".

ئەو ئەندامەی لیژنەی نەوت و غاز لە کۆتاییدا هێمای بۆ ئەوەکردوە، "پرۆژەکە یەکشەممە و دووشەممە خوێندنەوەی یەکەم بۆ پرۆژەکە دەکرێت، بە پەلەش دەچینە خوێندنەوەی دووەم، ئێمە شەڕ لەگەڵ کات دەکەین، لەسەر پرسی هەناردەکردنەوەی نەوت، کۆبوونەوەی هاوپەیمانی ئیدارەی دەوڵەت کرا، هەمووان لەگەڵ ئەوە بوون کە ئەو پرۆژەیە هەمووار بکریتەوە".