ماڵپەری سی ئێن ئێن تورک لە سەرچاوەیەکی باڵای تورکیی نێو کۆبوونەوەکەی نێوان نێچیرڤان بارزانی سەرۆکی هەرێم و ڕەجەب تەیب ئەردۆغان سەرۆک کۆماری تورکیاوە ناوەڕۆکی کۆبونەوەکەی ئاشکراکردوە.
بەپێی زانیارییەکانی سەرچاوەی ماڵپەڕەکە، سەردانەکەی نێچیرڤان بارزانی بۆ تورکیا سەردانێکی کتوپر نەبووە بەڵکو ماوەیەکی زۆربووە نێچیرڤان بارزانی ویستوویەتی بچێت بۆ تورکیا و ئەو سەردانەش بەرنامە بۆ دارێژراو بووە .
هەر بەپێی زانیارییەکانی ماڵپەڕەکە، لە کۆبوونەوەی نێوان سەرۆکی هەرێمی کوردستان و سەرۆک کۆماری تورکیادا، نێچیرڤان بازرانی هەموو گفتوگۆ و قسەکانی ناو کۆبونەوەکانی ئیمانیۆل ماکرۆنی سەرۆکی فەرەنسای لە بەغدا بۆ ئەردۆغان گیڕاوەتەوە.
ماڵپەڕەکە باسی لەوەشکردووە، ئەو پرسانەی کە نێچێرڤان بازرانی لەگەڵ ماکرۆندا باسی کردووە و دواتریش بۆ بەرپرسانی تورکیای گێڕاوەتەوە، چەند بابەتێک بوون کە ئەوانیش بریتیبوون لە بابەتەکانی پەیوەست بە ژمارەی سەربازی تورکیا لە عێراق و هێرشەکانی تورکیا بۆسەر ناوچە سنورییەکانی هەرێمی کوردستان .
بەپێی هەواڵەکەی سی ئێن ئێن تورک لە کۆبوونەوەکەدا، پرسی هاوکاریکردنی سەربازی و هەواڵگری لە نێوان هەرێمی کوردستان و تورکیادا لە دژی چەکدارانی پەکەکە تاوتوێکراوە.
ڕۆژی ٣ی ئەم مانگە ئیمانوێڵ ماکرۆن سەرۆکی فەرەنسا بە سەردانێک گەیشتە بەغدای پایتەخت و لەگەڵ سێ سەرۆکایەتییەکەی عێراق ونێچیرڤان بارزانی سەرۆکی هەرێمدا کۆبووەووە و بۆ ڕۆژی دواتریش نێچیڤان بارزانی بە سەردانێک گەیشتە تورکیا و لەگەڵ هەریەکە لە ڕەجەب تەیب ئەردۆغان و مەولود چاوشئۆغڵۆ وەزیری دەرەوەی ئەوە وڵاتە کۆبووەووە .