داستانی پێكەوە كۆبوونەوەكانی ئێمە لە پێنج ساڵ لەوە پێشەوە دەستی پێكرد لە كافە كتێبی "كاڵ" لە سنە.
كاتێك كە چەند خوێندكارێكی دكتۆرا پێشنیاریان دا ، هەر هەفتە و دوانیوەڕۆیەك پێكەوە كتێب بخوینینەوە، یان باس لەو كتێبە بكەین كە بڕیارمانداوە هەر كامێكمان و لە ژوورەكانی خۆماندا بە تەنیا بیخوینینەوە. دانیشتین 32 دوانیوەڕۆ ، بەفر باری و ئێمە فریا نەكەوتین بەفری "ئۆرهان پامۆك" بخوێنیەوە. فەلسەفە باری و شەقامەكانی سەن پێتێرزبۆرگ هەتا پاریسمان بەش كرد بۆ ئەوەی ئەزموونی مۆدێرنیتە بخوێنینەوە.
دوو هەفتە لەسەر ئەوە ناكۆك بووین كە مەبەستی " نیچە" چییە كاتێك دەڵێ دەچی بۆ لای ژنەكان، قامچی فەرامۆش مەكە و بە هیچ ئەنجامێك نەگەیشتن. باسمان لە مەرگ كرد، لە شك و گومان و لە دیاسپۆرا.دەیان بابەت و كتێبمان هەڵدایەوە و مانگەكان تێپەڕ بوون .
چەند كەسمان ڕۆیشتن و ئیتر لە سنە نەمان، دوو كەسمان زەماوەندیان كرد، كەسێكمان دادگایی كرا، ئەستێرەناسێكمان كە فیزیكی كوانتۆمی خوێندبوو، دیار نییە. یەكێكمان بووە مامۆستای زانكۆ لە باشوور، كەسێكمان خۆشەویستەكەی تەنها دوو هەفتە بەر لە شایی، لە دەست دا و هێشتا دەگری. نازانم كاممان خەیانەتمان پێ كرا، دووكەس لە ئێمە هەموو داهات و سەرمایەكەیان لە وڵاتی " چین" دۆڕاند. یەكێكمان بە سەر شێرپەنجەدا زاڵ بوو، هەر ئەوەی كە لە باسەكاندا سەری ڕادەوەشاند و دەیوت پێم سەیرە ئێوە چۆن بیر دەكەنەوە. كەسێكمان لە دەرەوی كوردستانە و ئێستا لە جیاتی باسكردن لە كتێب بەردەوام پۆست دادەنێ و دەنووسێت: بژی كوردستان .
ئێوارەكانمان تەواو بوون و هەر كام لە ئێمە بە تەنیا ، كتێبمان خوێندەوە وپارەی تەكسی و قاوە و لەچكە و كتێب و دەرمان و كارەبا و قەرزی زانكۆمان دایەوە، بە تەنیا فیلمە باشەكانمان بە شێوەی نایاسایی دانلۆد كرد و سەیری درۆكانی سەرۆك كۆمارەكانمان كرد.
ئێستا لە پاش ئەو پێنج ساڵە و لەسەر مێتۆدی "عەشق لە ساڵەكانی كۆلێرەدا" ئێمە كتێب لە سەردەمی كۆرۆنامان دەست پێكردەوە . بە دژواری و دوای چەند هەفتە دیالۆگی ناو ژوورە مۆبایلییەكان ، سەرەنجام لە ئێوارەیەكی زۆر گەرمی ناوەڕاست مانگی هاویندا ، دیسان كۆبووینەوە. ئەمجارە تەنها سێ كەس پاشماوەی ئەو 32 هەفتەیەن و ئەوانیتر كە هەر كامیان لە گرووپی دیكەدا بوون ،بڕیار وایە كتێب و شەڕ لە نێوان بێ هیوایی و هیواداریی و هاتن و نەهاتن و خەمۆكی و وەزە پێكەوە بەش بكەن .
لە یەكەمین دانیشتندا یەكترمان ناسی و دوو پرسیارمان لە یەكتر كرد و وڵاممان دایەوە و بۆ هەفتەیەكی دوای ئەوە كتێبی دەفتەری گەورە بەرهەمی ئاگۆتا كریستۆڤمان دەست نیشان كرد. هەڵبژاردنی كتێبەكە دوای مشت و مڕیكی زۆر و دەنگ بەرز و نزم كردن مسۆگەر بوو.
من فەرزادم. لە ئیدارەیەكی ماندووكەر كار دەكەم. ئەدەبیات ،كۆمەڵناسیی و هونەر دەتوانن ڕزگارم بكەن .
من ئەردەشێرم. ماستەری كۆمەڵناسیی دەخوێنم .مامۆستاكەم یارمەتی ئۆترووحەكەم نادا. ئەدەبیات و هونەر ،سینەما و بە تایبەت ڕۆمان، ژیان مانا دەكەن.
من فەرهادم. بەڕیوەبەرایەتییم خوێندووە و عاشقی دەروونناسیی و ئەدەبیات، زانستە مرۆییەكان و هونەرم .
من سوهەیلام. ئابووری سیاسی و مێژوو دەتوانن تەواوی رۆژ و شەوەكانم داگیر بكەن . ئەدەبیات، رووكەشەكان تێك دەشكێنێت و من شەیدا دەكات.
من روئوفم. ئارشیتێكتم بەڵام زیاتر لە هەموو شتێك ئەدەبیات و چالاكی لە بواری ژینگە و ژینگەپارێزییدا شادمانم دەكات.
من هایدەم. بیركارییم خوێندووە . هۆگری ئەدەبیات و سینەمام و پێم وایە نووسین جۆرێكیترە لە دیسیپلین و هاوكات تێكشكاندنی نۆرمەكان.
من تورانم. كامپیوتێرم لە زانكۆ خوێندووه و بەڵام رێگەی شادمانی و كیمیا، لە عێرفان و دەروونناسییدا دەبینمەوە.
من ئوركیدەم. بەڕێوەبەرایەتیم خوێندووە و ساڵانێكی زۆرە ڕاهێنانی وینەكێشی منداڵان درگایەكیترم بۆ دەكاتەوە و هۆگری ئەدەبیات وهەموو لقەكانی هونەرم .
من خالیدم. پزیشكم و ڕۆژانە بە سەد جار لێم دەپرسن ئەم كرۆنایە كەی تەواو دەبێت؟ من بەڵام ڕۆمان و هونەری سینەما دوورم دەكاتەوە لە هەموو ئەم سەرقاڵیانە.
من كەژاڵم . هەرچەند بەڕێوەبەرایەتی و زمانی ئینگلیزییم خویندووە، بەڵام هونەری "تژهیب" و دەروونناسیی و هونەر ژیانم چڕ دەكاتەوە.
من ڕەزام. بیزینێس مەنی پیشەسازیی وسەرچاوەسرووشتەییەكان. هەمیشە ئەدەبیات و هونەر رۆحم دەهەژێنێت و داگیرم دەكات.
من موژدەم. دۆكتۆرای پلان دانانی شارسازییم. لە نێوان كاری پیشەیی و ئەوەی دەمینێتەوە، ئەدەبیات ،دەرووننناسیی و هونەرە كە دەلاقەم بۆ دەكاتەوە.
من نێدام.یاسام خوێندووە . زیاتر لە هەموو شتێك عێرفان ،هونەر و ئەدەبیات دەتوانێت دەروازەكانی ژیانم بۆ بكاتەوه. دەروونناسیش هەمیشە سەرسامم دەكات.
منیش فەرهادم. ئەندازیارییم خوێندووە بەڵام رۆمان و هونەر و ئەدەبیات من شەیدا دەكات و دوورم دەخاتەوە لە ئاسن و پارە.
من خاترەم. چیرۆكنووسم. كتێبەكانم چاپ كراوون وهەموو جیهان بۆ من لە ناو وشەكاندا مانا دەگرێت.
من لوسیفێرم. هەڵبەت لە ناسنامەدا نووسراوە حەمید. ئەندازیارم . شەیدای ئوستوورەكان، ئەدەبیات و هونەرم. دەروونناسیش شێتم دەكات. هەڵبەت با ئەوەش بڵێم كە من شەیدای پارەم!
من بەیانم . یاسای نێو دەوڵەتی و دەروونناسیی كۆمەڵاتییم خوێندووە. دەمێك ساڵی دەنووسم و هەموو شتێكم پێ خۆشە بێجگە لە شەڕ.
حەوشەی كافە زۆر قەرەباڵغە و دووكەڵی جگەرە هەوای دار و درەخت و ئێوارەی داگیر كردووە. بێجگە لە پێكەنینی كتوپڕی هەموو ئەو گەنجانەی كە گاڵتەیان بە كۆرۆنا دێت و نە تەنیا ماسك لێ نادەن ، بەڵكوو چایی و قاوە و خواردنەكانی یەكتریش دەخۆن ، دە دەقیقە جارێك سەیارەیەك بە كۆڵاندا تێپەڕ دەبێت كە دەپاڕێتەوە ئاسنە شكاو و كەل و پەلی زیادەی ماڵ بكرێت. موزیكی كافە " شەوانی بارسێلۆنا" یە و لە نیوەدا داوا دەكەین كە بیكۆژێننەوە بۆ ئەوەی یەكتر ببیستین. ئەندامانی "دووشەنبەكانی كتێب" بڕیار دەدەن ئەمجارە لە ژوورەوه ی كافە دابنیشن و پەنجەرەكانیش ببەستن.
پشیلەیەكی بۆر و پشیلەیەكی ڕەش كە چەند پشتییان هەر لە كافە بووە ، لە ژێر كورسییەكان و لە نێوان پێێ ئێمەدا و مەركانەكاندا هاتوو چوو دەكەن.
ئامادەكاری دانیشتن: بەیان عەزیزی