ئەمڕۆ هەینی ٩ی١٠ی٢٠٢٠،  لەئۆسلۆی پایتەختی نەرویج خەڵاتی نۆبڵی ئاشتی بەخشرایە رێکخراوی پرۆگرامی خۆراکی جیهانی کە گەورەترین دامەزراوەی مرۆیی رێکخراوی نەتەوە یەکگرتووەکانە و بەدوای چارەسەرکردنی پرسەکانی برسێتی و باشترکردنی ئاسایشی خۆراکەوەیە لەجیهاندا .

کۆمیتەی خەڵاتی نۆبڵ لەڕاگەیەنراوێکدا بڵاویکردەوە، لەڕێگای پێدانی ئەم خەڵاتەوە دەمانەوێت سەرنجی جیهان بۆسەر ملیۆنان کەسی برسی لەجیهان رابکێشین کە خاوەنی ئاسایشی خۆراک نین و بەدەست هەژارییەوە دەناڵێنن .

ئاماژەی بەوەشکرد، هۆکاری بەخشینی خەڵاتەکە بە رێکخراوی پرۆگرامی خۆراکی جیهانی، بۆ هاوکاری و هەوڵەکانی ئەو رێکخراوە بۆ روبەڕوبوونەوەی برسێتی و زەمینەخۆشکردن بۆ سەقامگیری و ئاشتی جیهانیی دەگەڕێتەوە.

ساڵی رابردوو، پرۆگرامی خۆراکی جیهانی هاوکاری خۆراک و دەرمانی گەیاندووەتە نزیکەی 100 ملیۆن کەس لە 88 وڵاتی جیهاندا کە قوربانی کەمی خۆراک و برسێتی بون .

بە پرۆگرامی خۆراکی جیهانییەوە، تائێستا 25 رێکخراو خەڵاتی نۆبڵیان پێدراوە لەو 101 خەڵاتەی کە لەساڵی 1901-ەوە دابەشکراوە.