وەهبی ڕەسوڵ

لە یەكەم ڕوانینەوە پرسی وەبیرهێنانەوەی كارەساتە مێژویە هاوچەرخەكان، لەم دەستە كاركردنە نوێیەی (سامان ئەبوبەكر)دا خۆ ئاراستەی بیرەوەریەكانی بینەر ئەكات. بەرجەستەكردن و پێكهاتەی ئەم كارەساتانە ئێستایەكن لە ڕابوردوو هاوشان ڕابوردویەكن لە ئێستابونێكی هەنوكەییدا.

ووتاری ناوەڕۆك وەك پرسێكی ناوەكی پابەندگەرا، بزوێنەری گوتارێكی شێوازگەرا و مەعریفی كاری هونەریە. دامەزراندنی ئەو بۆ گوتارێكی تەكنیكی و شێوازگەرا لەسەر هیسابی پەیداكردنی توانایەكە، لە بنیاتنانی هێزێكی ڕایەڵە بۆ گەیاندنی وتارە واتاییەكەی. هەر ئەمەشە بوەتە هۆكاری ئەوەی توانای تەكنیكی و شێوازگەرایی هەڵبژێرراو، خۆی لە نەخشەی بازنەیەكی ئەزمونگەرا بۆ قوتار نەكرێت. گەرچی خواستی سەركێشیكردنی تەكنیكیانەی هونەرمەند، هەمیشە بزۆك و بێ‌ ئۆقرەیە، و لە چەند تابلۆیەكی كەمدا، پەلدەهاوێت بۆ چونە پێشەوەی زیاتر و گەشەكردن، بەڵام هێزی سنورداركردنی ووتن، تا ئێستای كاركردنی، ڕێگر بوە و ڕێگرە لەبەردەم باڵاكردنی چۆنیەتی ووتندا. ئەم سۆزداریە بۆ ووتن، جۆرێك لە دڵەڕاوكێی لە چەند خاڵێكی خولگەیی بەجێهێنانی تەكنیكیدا دروستكردوە، لەوانە: ساغنەكردنەوەی هەستی بەجێگەبون/ڕەهەندی سێ‌. 

نائامادەیی یەك بڕیاریی لە چارەسەری باكگراوند و فۆرگراوندی كارەكاندا. بەم هۆكارە لە هەندێ‌ لە كارەكاندا ڕاستەوخۆ، هەست بە دیمەن و وێنەی واقعیانەی پشتی شێوازە تەكنیكیەكەی هونەرمەند ئەكەین، بەڵام لە هەندێكی تردا دوور ئەمانبات، تا سنوری وونبون لە ناسینەوەی ئەو دیمەنانە. وێڕای بونی گەمەیەك لە دڵەڕوكێ‌، لەنێوان خۆسپاردن بە دو جۆری پڕۆسێس لە نیگاركێشیی سێ‌ ڕەهەندیی و دوو ڕەهەندیی. هەموو ڕابوردوی سامان، دنیایەكە لە سێ ڕەهەندی بەرجەستەكردن، هەربۆیە لە گەیشتن بە سنوری ئەم ئەزمونە كاركردنە نوێیەی، ئەو لێوانڕێژی دودڵیە لەنێوان سۆز بۆ ڕابوردوی كاركردنی، و ویستی ئەو بۆ زەرورەتێكی گۆڕانكاری لە داهاتوی كاركردنیدا. خولگەیەكی تری ئەم بەجێهێنانە تەكنیكیە، كێشەی بەكارهێنان و نەهێنانی ڕەنگە، و لەحاڵەتی بەكارهێنانیشیدا، كێشەی ئاست و چۆنیەتی بەكارهێنانیەتی. كە لە هەندێ‌ پێگەی تابلۆكاندا، بەكارهێنان و ئامادەبونی زیاتر لەپێناو ئامادەیی خودی ڕەنگ خۆیدایە، و نەبوەتە زەرورەتێكی تەكنیكی و لەویشەوە بپەڕێتەوە بۆ زەرورەتێكی واتایی، بۆ كامڵكردنی كۆبنیادی دەقێكی خوێنراوە. هەربۆیە زیاتر كامڵبونی تەكنیكی لەو كارانەیدایە كە كاری لەسەر یەك خێزانی ڕەنگیی كردوە. شیمانەی بەكراوەیی مانەوەی ئەم خولگە تەكنیكیانە، چەند بژاردەیەك لە توانای بەجێهێنانی تەكنیكی، بەمەبەستی گەیشتن بە ستایلێكی تایبەت و یەكگرتوو لە یەك ڕوئیایی هونەریدا بۆ داهاتوو، دەخاتە بەردەم هونەرمەند.    

بەڵام وەك مامەڵەی هونەرمەند لەگەڵ فۆڕمدا، توانیویەتی سەركەوتوانە تەكنیكی بەجێهێنانی گشتی كارەكانی، بەسەر جۆرەكانی ئامادەیی فۆڕمدا پەیڕەو بكات، لەم میانەدا ئەو جیاوازی نەكردوە لەنێوان فۆڕمی مرۆڤ و یەكەكانی تر. هەست ئەكرێت هەموو لە خاكەوە هاتوون و ڕەنگی خاكیان گرتوە. ئەم فۆڕمانە ئینتیمایەكی سەیر و گەرموگوڕیان بۆ خاك هەیە، وەك بڵێی ساتەوەختی دروستبونی تابلۆ، ئەوان لەخاك لەدایكبون و ئامادەن زۆر بە سانایی، ڕەنگ و فۆڕمی خۆیان بە خاك بسپێرنەوە. ئەمە چیرۆكی بەرگری و خۆشەویستی خاكە، چیرۆكی خەونە كۆمەڵییەكانە، كە لە گرواندن و ئامادەیی خۆیاندا، ئیستاتیكایەكی تەكنیكی لە بەشداربونی دەسەڵاتی ئەوی دی بەرهەم دێنن.

بەهیوای باڵاكردن و كامڵبونی زیاتری ئەم ئەزمونە هونەریە، دەستەكانی دەگوشم.