بەمەبەستی کەمکردنەوەی گرژییەکان، باڵاترین فەرماندەی سەربازیی ئەمریکا لەگەڵ رێکخراوی تاڵیبان کۆبووەوە.
سوپای ئەمریکا لە راگەیەندراوێکدا ئاشکرایکرد کە سێشەممەی رابردوو، ژەنەڕاڵ مارک میلی فەرماندەی سوپای ئەمریکا، پێش سەردانەکەی بۆ ئەفغانستان و کۆبوونەوەی لەگەڵ محەمەد ئەشرەف غەنی سەرۆک کۆماری ئەو وڵاتە، لەگەڵ شاندێکی رێکخراوی تاڵیبان کۆبووەتەوە.
ئاماژەی بەوەشکردووە، کۆبوونەوەکە لە دەوحەی پایتەختی قەتەر ئەنجامدراوە کە لە ئێستادا حکومەتی ئەفغانستان و رێکخراوی تاڵیبان لە دەوحە سەرقاڵی دانوستان و گفتوگۆن بۆ گەڕاندنەوەی ئاشتی و سەقامگیری بۆ ئەفغانستان.
پێشتریش بەرپرسانی باڵای ئەمریکا هۆشداریانداوە لەوەی کە زیادبوونی گرژی و توندوتیژییەکان لەلایەن چەکدارانی رێکخراوی تاڵیبانەوە، دانوستانەکانی ئاشتی روبەڕووی مەترسی دەکاتەوە.