بە بڕیاری مستەفا کازمی سەرۆک وەزیران و بەرپرسی گشتی هێزە چەکدارەکانی عێراق، ماوەی دوو رۆژە قۆناغی چوارەمی ئۆپراسیۆنی پاڵەوانانى عێراق لە دیالە دەستیپێکردووە و ھێزەکانی دژە تیرۆری یەکێتی نیشتمانی کوردستانیش لە ئۆپەراسیۆنەکەدا بەشدارن .
سەرچاوەیەکی ئەمنی لەسنوری پارێزگای دیالە بەتۆڕی (ھەواڵی ژیان)ی ڕاگەیاند، بە بڕیاری مستەفا کازمی و بەدرێژایی سنوری ئێران لە پارێزگای دیالە، قۆناغی چوارەمی ئۆپەراسیۆنی دژ بە پاشماوەکانی داعش بەھاوبەشی لەگەڵ ھێزەکانی دژە تیرۆری یەکێتی و ھێزەکانی ئاسایشی گەرمیان دەستیپێکردووە .
ئاماژەی بەوەشکرد، ئۆپراسیۆنەکە تەواوی ئەو ناوچانە دەگرێتەوە کە دەکەوێتە نێوان سنوری هێزی پێشمەرگە و سوپای عێراقەوە، تیایدا فڕۆکەی هاوپەیمانی نێودەوڵەتی و چەکی قورس بەکاردەهێنرێت و ڕووبەری ١٨ هەزار و ٧٠٠ کیلۆمەتر دووجا پاکدەکرێتەوە .
ئەوەشی خستەڕوو، لە ئۆپراسیۆنەکەدا هەریەکە لە فەرماندەی ئۆپراسیۆنەکانی سەلاحەدین و سامەڕا، هێزی دژە تیرۆری یەکێتی نیشتمانی و پۆلیسی فیدراڵی، هێزەکانی بەرپەرچدانەوەی خێرا، حەشدی شەعبی و لیواکانی هێزی تایبەت، لیوای هەشتی هێزی پاسەوانی سنور، دژە تیرۆر، فەرماندەی ئۆپراسیۆنی تایبەتی دوو، پۆلیسی پارێزگای دیالە و هێزی هاوپەیمانان بەشدارن .
قۆناغی چوارەمی ئۆپراسیۆنی پاڵەوانانى عێراق دژبە پاشماوەکانی چەکدارانی داعش، لە چوار میحوەرەوە لە ناوچەکانی باکور و باشوری قەزای خانەقین و ھەروەھا لە ناوچەی قەرەتەپە و باکوری ناحیەی جەلەولا دەستیپێکردووە.