بافڵ جەلال تاڵەبانی، سەرۆکی یەکێتیی نیشتمانیی کوردستان لە بارەگای مەکتەبی سیاسی لە هەولێر پێشوازی لە ئەلینا رۆمانۆسکی، باڵیۆزی ئەمریکا لە عیراق کرد.
ژیان:
لە راگەیەندراوی کۆبوونەوەکەدا هاتووە:" لەدیدارێکدا کە دەرباز کۆسرەت رەسوڵ، لێپرسراوی مەکتەبی پەیوەندییەکان ئامادەبوو، دۆخی سیاسیی هەرێم، عیراق و رۆژهەڵاتی ناوەڕاست گفتوگۆی لەبارەوەکرا و جەخت لە بەردەوامیی هەوڵە نیشتمانییەکانیان کرایەوە لەپێناو تێپەڕاندنی بەربەستەکان و زاڵبوون بەسەر ئاڵنگارییەکاندا.
باسلەوەشکراوە، لەدرێژەی دیدارەکەدا، بافڵ جەلال تاڵەبانی لەبارەی کۆی هاوکێشەکانەوە سیاسەت و ستراتیژی یەکێتیی خستەڕوو و رایگەیاند، پاراستنی سەقامگیریی وڵات و بونیادنانی داهاتوویەکی گەشتر پەیوەستە بە هاریکاری و هەماهەنگیی نێوان سەرجەم هێز و لایەنەسیاسییەکان و گفتوگۆی بونیادنەرانەوە.
سەرۆکی یەکێتی ئاماژەی بەوەشکرد، پێویستە هەمووان بەرپرسانە مامەڵە لەگەڵ دۆخەکە بکەن و بە ئامانجێکی هاوبەشەوە کار بۆ ئاوەدانیی و خۆشگوزەرانیی وڵات بکەن. وتیشی، بۆ بەدیهێنانی ئەم ئامانجە باڵایانەش پێویستە پارێزگاریی لە هاوبەشیی راستەقینە، تەبایی و پێکەوەژیان بکەین.