حەیان عەبدولغەنی وەزیری نەوتی عێراق لەمیانی بەشداریکردنی لەپانێڵی پێنجەمین دیداری ڕافیدەین لەبەغدا، سەبارەت بەڕەشنوسی پڕۆژەیاسای نەوت‌و گاز ڕایگەیاند: ئەوان چەندینجار لە بەغداو هەولێر، لەگەڵ هەرێم گفتوگۆو ڕاگۆرینەوەیان کردوە بەئامانجی داڕشتنی ڕەشنوسی پرۆژەیاسای نەوت‌و گاز، بەڵام نایشارینەوە، داواکارییەکانی هەرێمی کوردستان لەپڕۆژەیاساکەدا، لەگەڵ دەستور ناگونجێن.

وتیشی: لەگەڵ برایانمان لەهەرێمی کوردستان قۆناغی گفتوگۆمان سەبارەت بەڕەشنوسی پرۆژەیاسای نەوت‌و گاز تێپەڕاندوە، بەڵام هەندێک ڕوداو هاتنەپێشەوەو پرۆسەکەی وەستاند، داواکارییەکانی هەرێمیش ئاسان نین، ئەوەمان بیر نەچێت ئەم ڕەشنوسە دەبێت بگونجێت لەگەڵ دەستوری عێراق‌و ڕەچاوی پارێزگاو هەرێمەکانی بەرهەمهێنی نەوت بکرێت لەپڕۆژەیاسای نەوت‌و گازی عێراقدا.

لەساڵی ٢٠٠٧وە سێجار پڕۆژەیاسای نەوت‌و گاز ڕەوانەی پەرلەمانی عێراق کراوە، بەڵام لایەنە سیاسییەکان لەبەرئەوەی ناکۆکییان ھەبوو لەسەر بڕگەو مادەکانی، تێپەڕاندنی ئەستەم بوو، سەرەڕای ڕەشنوسەکەی ٢٠٠٧یش، ساڵانی ٢٠٠٨و ٢٠١١ دوو پڕۆژەیاسای نەوت‌و گاز لەلایەن ئەنجومەنی وەزیرانی عێراقەوە ئامادەکران، بەڵام تائێستا ڕێککەوتن لەبارەی هیچکامیانەوە نەکراوە.

ڕۆژی ١٥ی شوباتی ٢٠٢٢، دادگای باڵای فیدراڵیی عێراق یاسای نەوت‌و گازی هەرێمی کوردستانی بەنادەستوری لەقەڵەمدا، کە لەساڵی ٢٠٠٧ لەپەرلەمانی کوردستان پەسندکراوە.