دەقی بەیاننامەکەی تۆڕی هاوپەیمانی 19..

بەیاننامەی تۆڕی هاوپەیمانی 19 سەبارەت بە روداوە خوێناوییەكەی گوندی لاجان

تۆڕی هاوپەیمانی ١٩ رایدەگەیەنێت هەموو رواڵەتێكی توندوتیژی ئیدانە دەكات، داوا لەدەزگا ئەمنییەكانی پارێزگای هەولێر دەكات لێكۆڵینەوەی جدی لەسەر كوژرانی كەسێكی سڤیل لە بەردەم كۆمپانیای لاناز بكات و مافی هاوڵاتیان لە رێكخستنی خۆپیشاندان و گردبونەوە بپارێزێت و رێگر نەبن لە روماڵی رۆژنامەنوسان.
دوا نیوەڕۆی ئەمرۆ رێكەوتی 29 ی تشرینی دووەمی 2025، لەكاتی خۆپیشاندانی بەشێك لە هاوڵاتیانی گوندی لاجانی سەر بە پارێزگای هەولێر، لەبەردەم كۆمپانیایەك كە داوای دامەزراندنیان دەكرد، شەرو ئاڵۆزی روودەدات و لەئەنجامدا كەسێك دەكوژرێت و چەند كەسێكیتر بریندار دەبێت.
 هەروەها رێگری لەبەشێك لە دەزگاكانی راگەیاندن دەكرێت روماڵی روداوەكە بكەن و كەل و پەلی رۆژنامەوانیش دەشكێندرێت.
شەیما ئەحمەد پەیامنێری كەناڵ 8 بە تۆری 19 ی راگەیاند، لەكاتی روماڵی راستەوخۆدا بووم لەسەر روداوەكە لەلایەن چەند كەسێك بە بەرگی سەربازییەوە، هێرشكرایە سەرمان و پەخشەكەیان وەستاندین، هەروەها كەل و بەشێك لە كەلوپەلی رۆژنامەوانییەكەیشمانیان شكاند.
تۆڕی هاوپەیمانی ١٩  ئیدانەی كوژرانی خەڵكی سڤیل دەكات وداوا لەدەزگا ئەمنییەكانی پارێزگای هەولێر دەكات لێكۆڵینەوەی جدی لەسەر كوژران و برینداربوون بكات.
دەبێت مافی هاوڵاتیان لە ئەنجامدانی خۆپیشاندان و گردبونەوە پارێزراو بێت و رۆژنامەنوسانیش ئازادانە بیتوانن روماڵی  روداوەكان بكەن.