مەکتەبی سیاسی یەکێتی نیشتیمانی کوردستان رایگەیاند، پێویستە كەیسی جینۆسادی ئێزدییەكان، لەدادگای تاوانی نێودەوڵەتی، بەڕەسمی وەك تاوانی جینۆساید و دژی مرۆیی و جەنگ بناسرێت و ئەنجامدەرانی تاوانەكەش رووبەڕووی دادگا بكرێنەوە.
لەساڵیادی جینوسایدی كوردانی ئێزدی لەلایەن رێکخراوی تیرۆریستی داعشەوە، مەکتەبی سیاسی یەکێتی نیشتیمانی کوردستان پەیامێکی هاوخەمی بڵاوکردەوە و رایگەیاند، هێشتا بەشێكی زۆری تاوانبارانی ئەم كەیسە دەستگیرنەكراون و رووبەرووی یاسا نەكراونەتەوە و تاوانەكەیش وەك كەیسی جینۆساید لە ئاستی ناوخۆی عێراق و نێودەوڵەتیدا، كاری جددی لەسەر نەكراوە.
لە پەیامەکەدا هاتووە، جەخت لەوە دەکەینەوە کە پێویستە لە ھەرێمی كوردستان، لە ئاستی پەرلەمان و حكومەت و دامەزراوە پەیوەندارەكانی تر، لە ئاستی حزب و لایەنە سیاسیەكان و نوێنەرانی فراکسێۆنەکانی كوردستان لە بەغدا، كەیسی جینۆسادی ئێزدییەكان، بكرێتە خەمێكی ئینسانی و نیشتمانی و نەتەوەیی و هەوڵی بێوچان بدرێت، لەبەر رۆشنایی یاسا و رێككەوتنە نێودەوڵەتییەكان، بەتایبەت لەدادگای تاوانی نێودەوڵەتی، بەڕەسمی وەك تاوانی جینۆسایدو دژی مرۆیی و جەنگ بناسرێن، ئەنجامدەرانی تاوانەكەش رووبەڕووی دادگا بكرێنەوە، قەرەبووی كەسوكاری قوربانییەكان و زیانلێكەوتووان بكرێتەوە.
ئاماژە بەوەشکراوە، ئەركی نیشتمانی و نەتەوەیی و مرۆیی، لایەن و دامەزراوە پەیوەندارەكانیشە، بێ درێغ هەوڵبدەن سۆراغی بێسەروشوێنكراوەكان بكەن و چارەنووسیان یەكلایی بكەنەوە، گۆڕەبەكۆمەڵەكان هەڵبدرێنەوە و بەڵگەنامەكان بپارێزرێن، ناوچە زیانلێكەوتووەكانیش ئاوەدان بكرێنەوە و گوزەرانی خەڵكەكەی باش بكرێت.
دەقی پەیامەکەی مەكتەبی سیاسی یەکێتی نیشتمانیی کوردستان:
پەیامی مەكتەبی سیاسی یەکێتی نیشتمانیی کوردستان لە بیرەوەری خەمناکی جینوسایدی كوردانی ئێزدیدا
لە (3)ی ئابی ساڵی (2014) و رۆژانی دواتر، تیرۆرستانی رێکخراوی نەفرەت لێکراوی داعش، بەشێوەیەكی دڕندانە پەلاماری خەڵکی شەنگالیاندا و تاوانی گەورەی قەتلوعامیان دژی کۆمەڵگەی دێرین و رەسەنی ئێزدی بەرپا کرد .
لەو تاوانە دژە نەتەوەیی و نیشتمانی و ئینسانییەدا كە بەپێی یاسا ناوخۆیی و نێودەوڵەتییەكان، دەچێتە خانەی تاوانی جینۆسایدەوە، هەزاران هاووڵاتی مەدەنی كۆمەڵكوژ و بە هەزارانی تریش بێسەروشوێن كران ، بە شێوەی تاوانی رێکخراوەیی ، ھۆڤانە و دڕندانەی کۆنینە و نوێ، ژنان و پیاوانی ئێزدی لێکجیاکرانەوە، بە بەرچاوی کۆمەڵگەی مۆدێرنی مرۆڤایەتی لە سەدەی بیستویەکدا ، بازاڕی کۆیلایەتی و شەرمەزاری فرۆشتن و بازرگانی جەستەیان پێ زیندووکرایەوە .
ژنانی سەربەرز و رووسوری ئێزدیش ، سەرقافلەی زیانلێکەوتوانی ئەو تاوانە بوون .
ئێزدییەکان بەهۆی بنەچەی ئاینی و نەتەوەییانەوە ، لە مێژووی دوور و نزیكی ئەم رۆژھەڵاتەماندا ، دەیان جار رووبەرووی فەرمانی پاكتاو و جینۆساید و دەربەدەری بوونەتەوە، لەپشت هەریەك لەو تاوانانەوە، عەقلیەتێكی دواكەوتووی ڕەگەزپەرەستانە هەبووە، بەڵام کۆمەڵگەی ژیاندۆستی ئێزدی بە خۆراگری و ئیرادەی بەهێزەوە توانیویانە سەربەرزانە بمێننەوە. بۆ ئێستاش پێویستییەکی کوردستانی و عێراقی و ئینسانییە کار و کۆششیان بۆ بکرێ تا بەسەر ئاسەواری دوا تاوانی دژیان سەربکەون و ژیان و بوژاندنەوە و ئاوەدانی دەڤەرەکەیان ببێتە ئەجیندای پەرۆشی داھاتوومان .
لەیادی تێپەربوونی (6) ساڵ بەسەر ئەم تاوانەدا جارێكی تر ئیدانەی ئەم کۆمەڵکوژییە و ئەم لەکە پڕ شەرمەزارییەی داعش و رەفتار داعشییەکان دەكەینەوە ، سەری رێز لە ئاستی گڵكۆی هەموو شەهیدان و قوربانییەكان دادەنەوێنین و سڵاوی خۆراگری بۆ كەسوكارە سەربەرزەكانیان دەنێرین .
كەسوكاری سەربەرزی شەهیدانی ئێزدی ...
لەكاتێكدا یادی جینۆسایدی ئێزدییەكان دەكەینەوە، ئەنجامدەرانی ئەم تاوانە كە ڕێكخراوی تیرۆریستی داعشە، لەلایەن ھێزی پێشمەرگە و سوپای عێراق، بەیارمەتی وڵاتانی دۆست و هاوپەیمانانەوە رووبەرووی شكستی گەورە بوونەتەوە، بەڵام هێشتا بەشێكی زۆری تاوانبارانی ئەم كەیسە دەستگیرنەكراون و رووبەرووی یاسا نەكراونەتەوەو تاوانەكەیش وەك كەیسی جینۆساید لە ئاستی ناوخۆی عێراق و نێودەوڵەتیدا، كاری جددی لەسەر نەكراوە، هێشتا ئەو عەقلیەتەی هاندەری تاوانی لەم شێوەیەیە ، وەكو خۆیەتی و ڕەنگە لەبەرگی تردا خۆی مەڵاس دابێت و بخوازێت فەزای ژیان و ئایندەی کۆمەڵگەی فرەیی و رەنگینی کوردستان و عێراق و ناوچەکە ئالودە بکەنەوە، بۆیە وەك یەكێتیی نیشتمانیی كوردستان جەختدەكەینەوە، كە پێویستە لە ھەرێمی كوردستان، لە ئاستی پەرلەمان و حكومەت و دامەزراوە پەیوەندارەكانی تر، لە ئاستی حزب و لایەنە سیاسیەكان و نوێنەرانی فراکسێۆنەکانی كوردستان لە بەغدا، كەیسی جینۆسادی ئێزدییەكان، بكرێتە خەمێكی ئینسانی و نیشتمانی و نەتەوەیی و هەوڵی بێوچان بدرێت، لەبەر رۆشنایی یاسا و رێككەوتنە نێودەوڵەتییەكان، بەتایبەت لەدادگای تاوانی نێودەوڵەتی، بەڕەسمی وەك تاوانی جینۆسایدو دژی مرۆیی و جەنگ بناسرێن، ئەنجامدەرانی تاوانەكەش رووبەڕووی دادگا بكرێنەوە، قەرەبووی كەسوكاری قوربانییەكان و زیانلێكەوتووان بكرێتەوە .
ئەركی نیشتمانی و نەتەوەیی و مرۆیی، لایەن و دامەزراوە پەیوەندارەكانیشە، بێ درێغ هەوڵبدەن سۆراغی بێسەروشوێنكراوەكان بكەن و چارەنووسیان یەكلایی بكەنەوە، گۆڕەبەكۆمەڵەكان هەڵبدرێنەوە و بەڵگەنامەكان بپارێزرێن، ناوچە زیانلێكەوتووەكانیش ئاوەدان بكرێنەوە و گوزەرانی خەڵكەكەی باش بكرێت .
لەم بیرەوەرییە تاڵەدا ، سڵاو لە گڵكۆی شەهیدانی جینۆسایدی ئێزدییەكان و هەموو شەهیدانی كوردستان ...
نەفرەت لە تاوانكاران و تیرۆریستان ...
مەكتەبی سیاسیی
یەكێتیی نیشتمانیی كوردستان