سەرۆكی هەرێمی كوردستان رایگەیاند، كێشەكانی هەولێر و بەغدا بە تەنیا بابەتی موچە و بودجە نییە و چارەسەركردنی كێشەكانی نێوانیان پێكەوە بەستراون.
ئەمڕۆ نێچیرڤان بارزانی، سەرۆكی هەرێمی كوردستان، لەگەڵ مارتن هووس، باڵیۆزی یەكێتی ئەورووپا لە عێراق كۆبوویەوە و لەبارەی چەند تەوەرێكی جیاواز گفتوگۆیان ئەنجامدا.
بە گوێرەی راگەیەندراوی كۆبوونەوەكە، "دواین پێشهاتەكانی گفتوگۆی چارەسەركردنی كێشەكانی هەرێمی كوردستان لەگەڵ حكومەتی فیدراڵی عێراق" گفتوگۆی لەبارەوە كراو نێچیرڤان بارزانی، رایگەیاند: كێشەكانی هەولێر ـ بەغدا بە تەنیا بابەتی موچە و بودجە نییە و سەقامگیریی عێراق و چارەسەركردنی كێشەكانی هەولێر ـ بەغدا دوو بابەتی پێكەوە بەستراون.
سەرۆكی هەرێم ئەوەشی وت، یەكێتیی ئەورووپا و كۆمەڵگەی نێودەوڵەتی دەتوانن هاوكاریی عێراق بكەن بۆ چارەسەركردنی كێشەكانی نێوان هەرێم و بەغدا.
هەر لەو كۆبوونەوەیەدا "هەردوولا پشتگیریی خۆیان بۆ هەڵبژاردنە پێشوەختەكانی عێراق دەربڕی و دەربارەی چەند تەوەرێكی دیكەی وەك پەیوەندییەكانی عێراق و هەرێمی كوردستان لەگەڵ وڵاتانی دراوسێ" گفتوگۆكرا.