وتەبێژی ئۆپراسیۆنە هاوبەشەکانی سەربە سوپای عێراق ڕایگەیاند دۆخی بەغدای پایتەخت ئارامە و ئامادەن بۆ وەڵامدانەوەی هەر هێرشێک.
لیوا تەحسین خەفاجی وتەبێژی ئۆپراسیۆنە هاوبەشەکان بە ئاژانسی فەرمی عێراقی ڕاگەیاندوە هەروەها هاتووە:"ئەوەی ڕوویدا پێشێلکارییەکی ئەمنییە و کار دەکەین بۆ ئەوەی هۆکاری ئەو پێشێلکارییە و چۆنیەتی ڕوودانی ئەو پێشێلکارییە بدۆزینەوە و کێ یارمەتی تیرۆریستانیان داوە بۆ ئەوەی خۆیان بگەێننە شوێنەکە".
وتیشی"ئەوانەی هاوکاری ئەو تیرۆریستانە بوون بۆ چوونە ناو بەغدا دەستگیر دەکرێن و دەدرێن بە دادگا"
وتەبێژی ئۆپراسیۆنە هاوبەشەکان راشیگەیاندوە سورن لەسەر ئەوەی کۆتایی بە داعش و شانە نوستووەکانیان بهێنن.
هاوکات پێشنیوەڕۆی ئەمڕۆ ئەنجومەنی وەزیران بۆ ئاسایشی نیشتیمانی بە سەرۆکایەتی کازمی کۆبونەوەیەکی نائاسایی ئەنجامدا و پێشبینی دەکرێت هەندێک بڕیار لەسەر دۆخی ئەمنی دەربکات.
ئەوە لەکاتێکدایە دوێنی دوو تەقینەوەی خۆ کوژی یەک لەدوای یەک لەگۆڕەپانی تەیەرانی بەغدا رویداو لە ئەنجامدا 32 کەس کوژران و 110 کەسیش برینداربوون.