وەزیری دارایی و ئابوری هەرێمی کوردستان رایگەیاند، ئاشتەوایی و ڕێكکەوتنی هەرێم و بەغدا كاریگەری ئەرێنی لەسەر ئابوری عێراق و ناوچەكە دەبێت.
سەرلەبەیانی ئەمرۆ دووشەممە ٨ی٣ی٢٠٢١، ئاوات شێخ جەناب وەزیری دارایی و ئابوری هەرێم،
لە دیوانی وەزارەت پێشوازیکرد لە لیزا پۆدۆنڵی بەرپرسی یەكەی ئابوری كونسوڵخانەی
گشتی ئەمریكا لە هەولێر.
لە كۆبوونەوەکەدا باس لە ڕێكکەوتنی نێوان هەرێمی و بەغدا
كرا و چۆنیەتی بەڕێوەچوونی دانوستانەكانی نێوان هەرێم و بەغدا و باسی ئاستەنگەكانی
بەردەم ڕێكکەوتنەكە تاوتوێکرا.
هەر لە کۆبونەوەکەدا، وەزیری دارایی و ئابوری هەرێمی
کوردستان رایگەیاند، "ئاشتەوایی و ڕێكکەوتنی
هەرێم و بەغدا كاریگەرییەكی ئەرێنی لەسەر ئابوری عێراق بە تایبەتی و ناوچەكە بەگشتی
دەبێت".
لای خۆشیەوە، لیزا پۆدۆنڵی جەختی لەوە كردەوە، ئەوان پاڵپشتی
ڕێكکەوتنەكەی نێوان هەرێم و بەغدا دەكەن، لە هەمانكاتدا هاوكاری تەواوی ئابوری وەزارەتی
دارایی دەكەن و هەوڵدەدەن لە ڕێگەی چەند پرۆگرامێكەوە هاوكاری فەرمانبەرانی وەزارەتی دارایی و ئابوری حكومەتی هەرێمی
كوردستان بكەن.
بەمەبەستی رێککەوتن لەسەر بودجەی ٢٠٢١ی عێراق و جێگیرکردنی
پشکی هەرێم لە بودجەکەدا، تاوەکو ئێستا شاندی دانوستانکاری هەرێم زیاتر لە 10 جار
سەردانی بەغدایان کردووە و لەگەڵ حکومەت و سەرجەم لایەنە سیاسیەکان و لیژنەی دارایی
و پەرلەمانتاران چەندین کۆبوونەوەیان ئەنجامداوە و ئامادەیی خۆیان بۆ ڕادەستکردنی
بڕی 250 هەزار بەرمیل نەوتی رۆژانە دەربڕیووە، بەڵام بەشێک لە لایەنە سیاسیە شیعەکان،
داوای ڕادەستکردنی کۆی دۆسیەی نەوتی هەرێمیان کردووە.