پاش پێکهێنانی حکوومەتی هەرێم، دوو ڕێککەوتن لەنێوان حکوومەتی هەرێم و پارتی کرێکارانی کوردستان/پەکەکە لە ساڵانی ١٩٩٢ و ١٩٩٣ ئیمزا کرا. ئەوە یەکەمین ڕێککەوتنی ئیمزاکراوی نێوان حکوومەتی هەرێم و پەکەکەیە، کە لێرە وەک سەرچاوەیەکی مێژوویی دەقی هەردوو ڕێککەوتنەکە دەخەمە ڕوو، بەهیوای ئەوەی سوودی بۆ توێژەران، شرۆڤەکاران و میدیاکاران هەبێت .
ڕێککەوتنی یەکەم؛
لە ٢٩ی تشرینی یەکەمی ١٩٩٢ لە بارەگای ئەنجوومەنی وەزیرانی هەرێمی کوردستان، هەریەک لە فواد مەعسووم سەرۆکی حکوومەتی هەرێم و ڕۆژ نوری شاوەیس جێگری سەرۆکی حکوومەت، لەگەڵ شاندی پەکەکە کە پێکهاتبوون لە عوسمان ئۆجەلان و کەنعان سمۆ ئیمزا کرا. ڕێککەوتنەکە ڕاگەیاندنی پابەندێتی ئەنداماکانی پەکەکەیە لە هەرێمی کوردستان بە بڕیارێکی پێشووی پەرلەمان و حکوومەتی هەرێم لە ٥ی تشرینی یەکەمی ١٩٩٢دا لەسەر ئەوەی؛
یەکەم؛ پ. ک. ک پەیمان دەدا ڕێزی یاسای هەرێمی کوردستانی عێراق دەگرێت و هەموو ئەندام و کەسەکانی تا لەسەر خاکی هەرێم بن ئیلتزامی پێوە دەکەن. هەر لەم ڕوانگەیەوە؛
١ -خاکی کوردستانی عێراق بۆ کاری سەربازی بەکارناهێنن .
٢ -ئەو ئەندام و کەسانەی سەر بە حزبن و دەیانەوێ لە کوردستانی عێراق بمێننەوە دەگوازرێنەوە بۆ ئەو شوێنانەی حکوومەتی هەرێم دوور لە هێڵی سنووری تورکیا دەستنیشانی دەکات .
٣ - ئەمانە سەربەست دەبن لە هاتوچۆکردن بە ئاگاداری وەزارەتی ناوخۆ و بەگوێرەی ئەو پسوولانەی بۆیان دەکرێت .
٤ - ڕاگرتنی هێرشی ئیعلامی دژی حکوومەتی هەرێم و بەرەی کوردستانی .
دووەم؛
١ -ئەو کەسانەی ئەیانەوێ لە کوردستانی عێراق بمێننەوە و خۆیان خەڵکی کوردستانی تورکیان، حکوومەتی هەرێم پاراستنیان دەستبەر دەکات .
٢ - کەسانی (پ. ک. ک) سامانیان لە هەرێم دەپارێزرێت .
٣ - ئەو کەسانە بۆیان هەیە بە ئازادی چالاکی سیاسی لە هەرێم بنوێنن .
٤ - دەسەڵاتی هەرێم چارەسەری تەندرووستی بۆ بریندار و نەخۆشەکان دەستبەر دەکات .
ئیمزا؛
-فواد مەعسووم/سەرۆکی ئەنجوومەنی وەزیرانی هەرێمی کوردستانی عێراق
ڕۆژ شاوێس/جێگری سەرۆکی ئەنجوومەنی وەزیرانی هەرێمی کوردستانی عێراق .
-عوسمان ئۆجەلان ئەندامی وەفد .
-کەنعان سمۆ ئەندامی وەفد لە چاوپێکەوتنەکان .
ڕێککەوتنی دووەم؛
لە ڕۆژی ٢٧ی نیسانی ١٩٩٣ و لە بارەی سەرۆکایەتی ئەنجوومەنی وەزیران کۆبوونەوە لەگەڵ هاوڕێ (فەرهاد ئۆجەلان) کۆتایی پێهات، بە ئامادەبوونی وەزیری ناوخۆ بەڕێز یونس ڕۆژبەیانی و جێگری وەزیری ناوخۆ بەڕێز ئەحمەد شەریف و بەڕێوەبەری گشتی ئاسایش بەڕێز کەریم سنجاری، ئەمەی خوارەوە بڕیار درا؛
١ -دەبێ (پ. ک. ک) سەرجەم بەندەکانی ئەو ڕێکەوتننامە مۆرکراوەی ٣٠/١٠/١٩٩٢ی نێوان خۆی و حکوومەتی هەرێم جێبەجێ بکات .
٢ - بە هیچ شێوەیەک لە شێوەکان نابێت هێزەکانی لە ناوچەکانی سنووری بهێڵێ و هێزەکانیان دەست بدەنە کاری سەربازی و هێرش بردنە سەر حکوومەتی تورکیا لە خاکی کوردستانی عێراقەوە .
٣ - چارەسەری گیروگرفتەکانی (پ. ک. ک).
٤ - پەیوەندی (پ. ک. ک) لەگەڵ بەڕێوەبەرایەتی گشتی ئاسایش دەبێت دەربارەی وەزعیان لە ناوچەی (زەلی) و هاتوچۆیان لە شارەکاندا .
ئیمزا؛
-کۆسرەت ڕەسوڵ سەرۆکی ئەنجوومەنی وەزیرانی هەرێمی کوردستان
-د. ناسح غەفوور جێگری سەرۆکی ئەنجوومەنی وەزیرانی هەرێمی کوردستان .
-فەرهاد ئۆجەلان.