سۆرانی  |  بادینی  |  English      

یەکێتی گۆڵی لە خۆی کرد

  04/05/2021  |    1939 جار خوێندراوەتەوە

پارتی حزبێکی سەخییە لە کڕین و فرۆشتنی ئینسان، بەڵام لە بەخشینی دەسەڵات وەک دوکانداری جولەکە وایە؛ بڵێ دوو جاران دوو دەکاتە چەند؟ دەڵێ: لێم دەكڕی یان دەفرۆشی؟

*

پارتی ئەگەر زانیبای گۆڕان کەڵکی ماوە، قەت وا بە ئاسانی نەیدەهێشت کۆبوونەوە(نهێنییەکان) بگەنە ئەنجام. بە دڵنییایەوە تا پارتیش لای لە گۆڕان کردبایەوە و پشی پشی بۆ کردبایە، گۆڕان نەدەچووە ناو کۆشی یەکێتی؛ گۆڕانێک لە لوتکەی کاری سیاسیدا ٨ کورسی لە پەرلەمانی بەغدا هێنابێت، ئێستا چەند دێنێ؟

*

حزبێک کە بەس ئەوەندە ماوە بە ئاشکرا لافیتەی فرۆشتنی لەسەر هەڵواسن، لە خەفادا ئەوەندەی نەدەهێنا کە یەکێتی لەسەر حیسابی بە حیساب گۆڵ کردن لە پارتی ماری نووستووی شارچییەتی لەناوخۆیدا بەخەبەر بێنێتەوە. تەنانەت کار گەیشتە ئەوەی کە کوڕانی کۆسرەت رەسوڵ دەستلەکارکێشانەوەی خۆیان بدەنە سەرکردایەتیی یەکێتی !

*

یەکێتی گۆڵی لەخۆی کردووە. هەر لە ئێستاوە جگە لە ناڕەزایەتیی ناوخۆیی، ئەگەری ئەوە هەیە چەند کۆرسییەک لە کیس خۆی بدات. ها ئەگەر بگوترێ ئەوە سەرەتایەکە بۆ تێکەڵبوونەوەیان و ئەوە سەرەتای هەنگاوێکی دوورمەودایە، ئەوەش راست نییە؛ یەکێتی و گۆڕان لە رابردوودا رێککەوتنی ستراتیژیشیان ئیمزا کرد دادی نەدان، ئێستا چ گۆڕاوە؟ سیاسەتکردن بەڕقهەڵگرتن وەک قوماری لێدێت .

*

یەکێتی لە دوای کۆنگرەوە دەرفەتی زۆری لەبەردەم بوو بۆ پێداچوونەوە بە هەڵەکانی رابردووی، بەڵام پێناچێ توانیبێتی بازنەی بیرکردنەوەی خۆی بۆ حزبێکی گەورە فراوان بکات، بۆیە باجی هەڵەی لۆکاڵیبوون دەداتەوە، ئەوەش رێک ئەو شتەیە کە پارتی تەمەننای دەکات .

*

دواجار ململانێی لەو شێوەیە لەگەڵ پارتیدا، سودی نییە و لە نیهایەتدا دەبێ لە بارەگای    بارزانی بڵێن:"ئێوە خانەوادەیەکی نەجیبن، بە بەخشندەیی خۆتان لێمان ببوورن."


زیاتر