شەوی رابردوو لەشاری سلێمانی کچێکی نیپاڵی کۆتایی بەژیانی خۆی هێنا، پۆلیسی سلێمانی دەڵێت "دانیشتوی گەڕەکی رزگاریە و لەدایکبووی ساڵی ٢٠٠٠ "
سەرکەوت ئەحمەد، وتەبێژی پۆلیسی سلێمانی بە ژیانی راگەیاند: شەوی رابردوو کچێکی نیپاڵی کە لەدایکبووی ٢٠٠٠ کۆتایی بەژیانی خۆی هێناوە، تیمەکانی بەڵگەی تاوان و پۆلیسی گەڕەکی رزگاری چونەتە شوێنی رووداوەکە و لێکۆڵینەوە دەکەن.
وتیشی، تا ئێستا هۆکاری رووداوەکە دیار نیە لەسەر چ شتیک ئەو کچە خۆی کوشتوە، بەڵام لێکۆڵینەوەی زیاتر لە رووداوەکە دەکرێت بۆ ئەوەی هۆکاری خۆ کوشتنەکەی ئاشکرابکرێت.
ئاماژەی بەوەشدا: بەو کۆمپانیایە راگەیەندراوە کە کچەکە کاری تێداکردوە، کەسوکاری ئەو کچە نیپاڵییە ئاگاداربکرێتەوە کە لە شاری سلێمانی کۆتایی بە ژیانی خۆی هێناوە، چونکە لە ئێستادا تەرمەکەی بۆ پزیشکی دادی سلێمانی گواستراوەتەوە.