ڕاشیدەگەیەنێت، هاوکاریەکانى هاوپەیمانان لەڕوو چەک و ئامێرى پێشکەوتووە بۆ هێزەکانى پێشمەرگە جێگەی هەڵوێستە لەسەرکردنە و ئەنجامەکەی بەچاوی خۆمان دەبینین.

هاوسەرۆکایەتی تەڤگەری ئازادی، بەپێویستیشى دەزانێت، وەزارەتی پێشمەرگەو لیژنەی پێشمەرگە لە پەڕلەمانی کوردستان بەگرنگییەوە لە دۆخ و ژیانی پێشمەرگە بڕوانن.

ئەوەش دواى ئەوەدێت، لە سنووری پردێ و لەنزیک گوندی قایەباشی، چەکدارانی داعش هێرشیان کردە سەر خاڵێکی پێشمەرگە و رووبەڕووبوونەوە دروستبوو، بەهۆیەوە سێ پێشمەرگە شەهید بوون و دوو پێشمەرگەی دیکەش بریندارن.

دەقى ڕاگەیەندراوەکە:

‎بەداخ و پەژارەیەکی زۆرەوە ئەمشەو لە دەوروبەری پردێ و لە بەرزاییەکانی (زورگەزراو) بەهۆی هێرشی تیرۆرستانی داعش سێ پێشمەرگە شەهید بوون و چەند پێشمەرگەیەکیش بریندار بوون

‎وەک تەڤگەری ئازادی سەرەخۆشی خۆمان ئاڕاستەی بنەماڵە سەربەرزەکانیان دەکەین و لە ناخەوە خەمباری خۆمانتان پێ ڕادەگەیەنین، وە هیوای چاکبونەوەی خێرا بۆ بریندارەکان دەخوازین

‎دەمانەوێت ئەوەش ڕابگەیەنین کە هێرشەکانی دەوڵەتی تورکیا بۆ ناوچە سنوریەکانی باشوری کوردستان و ئەو جوڵانەی داعش لە ناوچە کێشەلەسەرەکان لەیەکتر دابڕاو نین و پەیوەندیەکی توندوتۆڵ لە نێوانیاندا هەیە و لە چوارچێوەی یەک پلاندایە، وە نەبوونی هەماهەنگی لە نێوان هێزی پێشمەرگەو ھێزەکانی بەرگری عێراق و یەکنەگرتنەوەی هێزی پێشمەرگە بۆخۆی بەشێکە لە هۆکاری ئەم هێرشانە، هەربۆیە دەبێت هەرچی زووە هێزەکانی پێشمەرگە یەک بخرێنەوە.

‎وێڕای ئەوەی هێزەکانی هاوپەیمانان ڕۆژانە دەڵێن ئێمە بودجەیەکی زەبەلاح بۆ ئاسایشی هەرێم سەرف دەکەین و خاوەنی جۆرەها چەک و ئامێری پێشکەوتوی سەربازین، ئەوەتا ئەنجامەکەی بەچاوی خۆمان دەبینین، بۆیە ئەمەش جێگەی هەڵوێستە لەسەرکردنە.

‎دەبێت باش بزانین لە ئێستادا و لە داهاتوشدا مەترسی گەورە لەسەر ئاسایشی هەرێم و بە گشتی عێڕاق هەیە، هەربۆیە دەبێت گەلەکەمان لەم مەترسیانە ئاگاداربکرێنەوە و تەدبیر وەربگرین بۆ داهاتوو، وە گیانی وڵاتپارێزان بۆ ئێمە لەهەموو شتێک گرنگترە بۆیە ئەبێت وەزارەتی پێشمەرگەو لیژنەی پێشمەرگە لە پەڕلەمانی کوردستان بەگرنگییەوە لە دۆخ و ژیانی پێشمەرگە بڕوانن

‎دەستەی هاوسەرۆکایەتی تەڤگەری ئازادی

1/5/2021