لە راگەیێندراوێکدا  نووسینگەی رێکخەری راسپاردە نێودەوڵەتییەکان  هەرێمی کوردستانددا هاتووە، "حکومەتی هەرێمی کوردستان ئەو بەهایانەی گرتووەتە باوەش کە پێویستن بۆ بەرجەستەکردنی وڵاتی دامەزراوەیی، کۆمەڵگەیەکی مەدەنیی هاوچەرخ، و پشت دەبەستێت بە ستراتیژیی پتەو بۆ داڕشتنی یاسا و رێسا بەشێوەیەک کە لە بەرژەوەندیی ئازادییە تاکەکەسییەکان بێت ".

لە بەشێکی دیکەی ڕاگەیەندراوەکەدا ئاماژە بەوە کراوە "دادگاکان سەربەخۆن و حوکمەتیش دەست لە پرۆسە یاساییەکان وەرنادات. داوا لە قەوارە بیانی و ناوخۆیبەکان دەکەین رێز لە بڕیارەکانی دادگا بگرن. هاوکات، دەستبەسەرکردن و دەستگیرکردن تەنیا بە بڕیاری دادگا جێبەجێ دەکرێن ".

 ئاماژەی بەوەشکردووە، لە 16ی شوباتی 2021 دا دادگای تاوانی هەولێر سزای 6 ساڵ زیندانی بەسەر 5 تۆمەتباردا سەپاند. دوای ئەوەی پەڕاوی دادگا رەوانە کرا بۆ تێهەڵچوونەوە، دادگای پێداچوونەوەی هەولێر بڕیارەکەی دادگای تاوانی لە 6 ی ئایاردا پەسەند کرد. لە 27 ی حوزەیراندا، دوای بڕینی گشت فلتەری دامەزراوە یاساییەکان، بڕیارەکە پەسەندکرا.

ڕوونیشیکردووەتەوەن دادگای تاوانەکان دۆسیەی ئەو پێنج کەسەی گواستەوە بۆ دادگای پێداچوونەوە، دادگایەکەش لە دوو قۆناغی یاساییدا بڕیاری دادگای تاوانەکانی هەولێری پەسەندکرد .

نووسینگەی رێکخەری راسپاردە نێودەوڵەتییەکان  ووتوویەتی "حکومەتی هەرێمی کوردستان میدیای ئازاد بە کۆڵەگەیەکی گرنگی حوکمڕانی و توخمێکی بنەڕەتی دیموکراسی دەزانێت. ئێمە شانازی دەکەین کە کوردستان میدیای ئازاد و بێ بەندوباوی هەیە و نموونەی بەرجەستەکردنی بەهاکانی ئازادی رادەربڕین و ئازادی راگەیاندنە لە ناوچەکە و هەمیشە پێویستی هەیە بۆ بەرەوپێشبردنی دۆخەکە" .

ئاماژەی بەوەشکردووە، حكومەتی هەرێم داوای لە نێردەی تایبەتی نەتەوە یەکگرتووەکان بۆ هاریکاری عێراق (یۆنامی) و نووسینگەی تایبەتی کۆمیسیاری نەتەوە یەکگرتووەکان بۆ مافەکانی مرۆڤ کردووە، هاوکار بن لە بەرەوپێشبردنی سیستەمی یاسایی. هاوکات، ئێستا هەماهەنگی لەگەڵ وڵاتانی بیانی هەیە بۆ راهێنان بە دادوەران .

لە بەشێکی دیکەی ڕاگەیەندراوەکەدا ئاماژە بەوەشکراوە، حكومەتی هەرێم رێککەوتنی لەگەڵ کۆمیتەی خاچی سوور هەیە و بە گوێرەی رێککەوتنەکە لایەنی ناوبراو بۆی هەیە بێ مۆڵەت سەردانی تەواوی زیندانی و سەنتەره‌كانی چاکسازی بکات لە هەرێم. یۆنامییش بەم دواییانە مۆڵەتی سەردانی پێدراوە. لە ژێر رۆشنایی ئەم رێککەوتنە، یۆنامی 14 سەردانی ئەنجامداوە و چاوپێکەوتنی لەگەڵ 60 زیندانی ئەنجامداوە .

باسی لەوەشکردووە،  وڵاتانی یەکێتی ئەوروپا بانگهێشت کراون بۆ بەرەوپێشبردنی چاکسازیی یاسایی و دادوەرییەکان لە هەرێم. هەروەها، دامودەزگاکان سەبارەت بە پرسی ئازادییەکان لەگەڵ رێکخراوەکانی کۆمەڵگەی مەدەنی و سەندیکای رۆژنامەنووسان لە گفتوگۆ دان .

لە کۆتایی ڕاگەیەندراوەکەدا جەختیکردووەتەوە، حکومەتی هەرێمی کوردستان تەواو پابەندە بە حوکمی یاسا و بە پرۆسەی یاسایی دادپەروەرانە و بێلایەنی و ئازادی راگەیاندن کاری لەپێشینەیەتی. حکومەت لەگەڵ هاوتا نێودەوڵەتییەکان کاردەکات بۆ دڵنیابوون لەوەی کە کوردستان بەتەواوی پابەنده بە پێوەرە نێودەوڵەتیەکانی مافی مرۆڤ، بە تایبەتی لە بواری ئازادی میدیادا .