وەزارەتی ناوخۆ رێنماییەکی نوێ بۆ شۆفێرانی تەکسی دەردەکات

  2023-01-25  | 
دۆسیە:  کوردستان
 تۆڕی هەواڵی ژیان
وەزارەتی ناوخۆ بە هاوبەشی لەگەڵ وەزارەتی گواستنەوە گەیاندن چەند بڕیارێک بۆ شۆفێرانی تەکسی دەردەکەن

بەگوێرەی نووسراوێکی وەزارەتی ناوخۆ، لەمەودوا لۆگۆی تەکسی دەدرێت بەو شۆفێرانەی لە ناوچەکانی دەرەوەی هەرێم نیشتەجێن و لە هێڵی گواستنەوەی نێوان هەرێم و ئەو ناوچانەی دەرەوەی ئیدارەی هەرێم کاردەکەن، هەروەها پێدانی لۆگۆی تەکسی بەو هاوڵاتیانی کە دانیشتووی شارەکانی هەرێمن و بەڵگەنامە فەرمییەکانیان سەر بە ناوچە کوردستانیەکانی دەرەوەی ئیدارەی هەرێمە 

بەپێی بڵاوکراوەکەی وەزارەتی ناوخۆ، "هەرکەسێک مووچەکەی لە خوار یەک ملیۆن دینارەوە بێت لۆگۆی تەکسی پێدەدرێت و دەبێت ساڵانە بۆ نوێکردنەوە پشتگیری فەرمانگەکەی ببات".

بەپێی بڵاوکراوەکە، تا ڕێکەوتی ١٥ ی تەمووز مۆڵەت بۆ شۆفیرانی تەکسی دانراوە بۆ وەرگرتنی لۆگۆی تەکسی و بەپێی رێنماییەکان لە دوای ئەو بەروارە هەر تەکسییەک بێ لۆگۆ کاربکات ئەوا دەست بەسەر تەکسییەکەیدا دەگیرێت..