بەپێی نوسراوێك كە ئەمڕۆ یەكشەممە ١٢ی٧ی٢٠٢٠، لەلایەن دادگای لێكۆڵینەوەی هەولێرەوە دەركراوە،  فەرمانی دەستگیركردن بۆ سۆران عومەر ئەندامی پەرلەمانی كوردستان لە فراكسیۆنی كۆمەڵ دەركراوە.

نوسراوەكە ئاراستەی گشت ئەندامانی بەرزەفتی دادوەری و گشت ئەندامانی پۆلیس كراوە، کە واژۆی دادوەر عیماد فارس رەشیدی لەسەرە و تیایدا فەرمانی دەستگیركردن بۆ سۆران عومەر دەركراوە .

لە نوسراوەکەدا ئاماژە بەوەكراوە، ئێوە رێگەتان پێدراوە و لەسەرتانە تۆمەتبار سۆران عومەر سەعید، بگرن و بیدەن بە دادگای لێكۆڵینەوەی هەولێر، چونكە لە بنكەی پۆلیسی خانەقا سكاڵای لەسەر تۆماركراوە .

دەركردنی ئەم فەرمانە لەكاتێكدایە كە رۆژی 7ی ئایاری ئەمساڵ، پەرلەمانی كوردستان بە دەنگی 57 پەرلەمانتار پارێزبەندی لەسەر سۆران عومەر، ئەندامی پەرلەمانی كوردستان هەڵگرت، ئەوەش نارەزایی و ناكۆكی نێوان لایەنە سیاسییەكانی لێكەوتەوە.