بەشدار حەسەن، سەرۆکی تیمی پارێزەرانی گیراوانی بادینان لە لێدوانێکدا بە رووداوی راگەیاندووە، "دوای سزادانی شێروان شێروانی بە چوار ساڵ زیندانیکردن، داوای تەمیز کردنەوەمان کرد و ئەمڕۆ سزاکەی لە چوار ساڵەوە بۆ دوو ساڵ کەمکرایەوە."

دەشڵێت، بڕیاربوو مانگی ئەیلوولی ئەم ساڵ شێروان شێروانی ئازاد بکرێت، بەڵام رۆژی پێنجشەممە، 20-07-2023 دادگای هەولێر بە هەردوو مادەی 298 و 295 بە چوار ساڵ زیندانیکردن سزای دایەوە. 

دادگای تاوانی هەولێر، رۆژی 16-02-2021 بە تۆمەتی "تێکدانی ئاسایشی نیشتمانی" هەریەک لە شێروان شێروانی، ئەیاز کەرەم، گوهدار محەممەدئەمین، هاریوان عیسا و شڤان سەعیدی بە یەکی شەش ساڵ زیندانیکردن سزادا. مانگی شوباتی 2022 بە فەرمانی نێچیرڤان بارزانی، سەرۆکی هەرێمی کوردستان 60%ـی سزاکەیان، جگە لە شێروان شێروانی کە 50% بوو، کەمکرایەوە.

لە ئێستادا هەردوو رۆژنامەنووس "شێروان شێروانی و گوهدار زێباری" لە زیندانن و ئەوانی تر ئازادكراون.