عەقید سەلام عەبدولخالق، لێپرسراوی ڕاگەیاندنی دەزگای ئاسایشی هەرێم بە دەنگی ئەمریکای ڕاگەیاندوە، "ئێمە لایەنی جێبەجێکارین؛ بڕیارەکە لەلایەن ئەنجومەنی دادوەری عێراقەو دراوە کە مۆڵەتیان نەماوە بۆ کارکردن لە عێراقدا".

‎ئاماژەی بەوەشکردوە، "مۆڵەتیان تەواو بوە؛ کاتەکە دیارە هەتا کۆتایی ٢٠٢٤ بوە، بڕیارەکە دەرکراوە و ئێمە جێبەجێکارین چونکە لەو شوێنانەیە کە سنوری ئێمەن".

هاوکات، ڕوناک مەجید، ئەندامی ڕێکخراوی ژنانی ئازادی کوردستان ڕایگەیاند، "ئاسایش بەبێ ئاگادارکردنەوە یاخود بڕیاری دادوەر هاتە سەر بارەگاکەمان و ئاگاداریان کردین کە دەبێت بارەگاکەمان دابخەین".

وتیشی، "درێژکراوەی ئەو بڕیارەیە کە لە مانگی هەشتدا درا و سێ پارتی سیاسیان لە هەرێم قەدەغەکرد، بۆ ئەمەش ڕێککەوتنی هاوبەش ئەنجامدراوە لە نێوان عێراق و تورکیا؛ فشار لە بەرپرسانی سلێمانیش کراوە بۆ جێبەجێکردنی بڕیارەکە؛ بۆیە بڕیارەکە سیاسییە".

بەرپرسانی ئەو ناوەندانە ڕایدەگەیەنن، هەتا ئێستا هیچ ئاگادارکردنەوەیەکیان لەلایەن حکومەتی عێراق و هیچ نوسراوێکی فەرمی دادگایان سەبارەت بە بڕیاری داخستنەکە پێنەگەیشتوە.