هونەر تەنیا بوارێک نییە، بەڵکو لە ناو هەر کام لە جۆرەکانى هونەردا کۆمەڵێک ڕەگەزى دیکە هەن کە هونەر بەبێ ئەوان ئەنجام نادرێت، لە ناو هونەرى شانۆ و سینەمادا ئارایشت یەکێک لە ڕەگەزە گرنگەکانە و ئەگەر بە وردیش مامەڵەى لەگەڵدا بکەین بۆخۆى دەبێتە هونەرێک کە ئەنجامدەرەکەى دەتوانێن توانا و بەهرەى خۆى تێدا نیشان بدات، ئەلزا ئارام خاوەنى بڕوانامەى دیبلۆم لە شانۆ و بەکالۆریۆسە لە سینەمادا و چەند ساڵێکە لە بوارى شانۆ و سینەمادا کار دەکات، چ وەک دەرهێنەر، چ وەک ئاکتەر، چ وەک مایکئەپ ئارتێست،.. بۆیە لەم دەرفەتەى (تۆڕى هەواڵى ژیان)دا مەبەستمان دەربارەى هەندێک بابەتى تایبەت بە ئارایشت ئەو بدوێنین.

گرنگی ئارایشت لەهونەری سینەمادا نیشاندانی بەشێکی دیاری ڕووخساری کارەکتەرەکەیە کاتێک بە نمونە دەتەوێت وەسفی ئەکتەرێکی ڕووخۆش یاخود غەمگین یا پیرکردن وە یاخود برین و جۆرەکانی تر بکەیت ... هەموو ئەمانە دەبنە وەسیلەیەک بۆ خزمەتی کارێکی هونەری وە بۆ ئەکتەر بەتایبەت ، بۆ شانۆش بەهەمان شێوە بەڵام جیاوازتر لەسینەما دەبێت ئارایشت بەشێوەیەکی تۆخ و بەرچاو بکرێت واتا زیادەڕەوی تێدا دەکرێت.

لەدونیای هونەری ئێمەدا ئارایشت تاڕادەیەکی باش پێشکەوتنی بەرچاوی بەخۆوە دیوە بەو پێیەی کە لەساڵانی ڕابردوودا مەوادی باش و پێویستی و بەرهەمەکانی ئارایشت بەردەست نەبووە ، ئەمە هۆکارێک بووە بۆ گرنگی پێنەدانی و بەهەند وەرنەگیراوە لەکارە هونەرییەکاندا ، وە ڕێگەیەکی ئاسان نەبووە بۆ بەدەستهێنانی ناچار هەوڵدراوە سوود لەڕەنگ و بابەتی سروشتی وەربگیرێت . بەڵام لەئێستادا جیاواز لەساڵانی ڕابردوو گرنگی پێدەدرێت و کار بەکەسانی شارەزا دەکرێت بۆ ڤیدیۆ کلیپ و ڕیکلام ... لێرەدا ئەمەوێت بڵێم ئەوەی کە جێگای نیگەرانییە کەسانی پسپۆڕو شارەزا ژمارەیان زۆر کەمن، ئەوانەش کە ئامانجیانە فێربن هیچ دەرفەت و بوارێکیان بۆ نەڕەخساوە بخوێنن و قوڵبنەوە لەم هونەرەدا تەنها بەهەوڵی خۆیان فێری ئارایشتی جوانکاری بوون کە ئەمە دوورە لەکارە هونەر و سینەماو شانۆوە . لەبیرمان نەچێت هەمیشە لەکارە شانۆییەکاندا ئارایشت بەکارهاتووە ، بەڵام بەبڕوای من لەچوارچێوەیەکی داخراودا ماوەتەوە هیچ گۆڕانکارییەکی تێدا نەکراوە تاکو ئەم ساتەوەختەی ئێستاشمان.

هونەر هیچ کات لەلای ئێمە نەبۆتە پیشەیەک کە بتوانین لەسەری بژین ، بێگومان لەپاڵ کاریتردا دەتوانرێت ئەو بۆشایی پڕ بکرێتەوە.

ئەو جیاوازیانەی هەیە لەئارایشتی شانۆدا ئەوەیە کە دەبێت زیادەڕەوی تێدا بکرێت و بەشێوەیەکی تۆخ ئەنجام بدرێت بۆئەوەی لەچاوی دوورترین بینەری ناو هۆڵێکی شانۆوە ڕوخساری ئەکتەر ببینرێت ، بەڵام دەربارەی کاری سینەمایی بەپێچەوانەوە دەبێت ئەکتەر ڕوخسارێکی زۆر سادەو سروشتی هەبێت زیادەڕەوی تێدا نەکرێت ، چونکە کاتێک ڕوخساری ئەو ئەکتەرە لەفرەیمێکی نزیکدا وەردەگیرێت وادەکات ئەکتەرەکە نائاسای وەک بوکەڵەیەک دەرکەوێت.

نوێترین کاری من بەشداری کردنم بوو وەک مایکەپ ئارتیست لەشۆت فیلمێکدا بەناوی (وێڵاش) ، لەدەرهێنانی دێنی بەکر ، لەم کورتە فیلمەدا جیاواز لەکارەکانی پێشترم دروست کردنی سکی ئافرەتێکی دووگیان بوو هەروەها منداڵێک بەناوک و وێڵاشەوە  بۆ ساتەوەختی لەدایکبوونی کۆرپەیەک کە وا پێویست بوو بۆ فیلمەکە . هونەر بۆ من ڕێگایەکە گەڕانەوەی نییە و بەردەوامی هەیە ، بۆیە هەمیشە بەدوای جۆرێک لەکارکردنەوەم کە جیاوازو سەرنجڕاکێش بێت بۆ وەرگر ئەگەرچی زۆر ماندوبوونیشی پێویست بێت چێژبەخشە دووبارە هێزم پێدەبەخشێتەوە بۆ دەستپێکردنەوەو گەڕان و تازەبوونەوە .