بەڕێوەبەری نەهێشتنی ماددە هۆشبەرەكانی سلێمانی رایگەیاند، لە ئۆپراسیۆنێكی هێزەكانیان توانیویانە دەستبەسەر نزیكەی 21 كیلۆ ماددەی هۆشبەردا بگرن كە لە هەوڵدابوون بۆ دەرەوەی سلێمانی رەوانەی بكەن.
پشتیوان بەهادین، لە كۆنگرەیەكی رۆژنامەوانیدا رایگەیاند: بەشی لێكۆڵینەوەی ئاسایشی سلێمانی توانی لە ئۆپراسیۆنێكدا دەستبەسەر زیاتر لە 20 كیلۆ ماددەی هۆشبەردا بگرن كە لە كەرەسەتەی ئۆتۆمبێلدا شاردبوویانەوە و لە هەوڵدابوون بەرەو دەرەوەی سلێمانی بەرن.
ئەوەشی روونكردەوە: لەگەڵ ئەو ماددە هۆشبەرەدا بڕێك حەب دەستی بەسەرداگیراوە كە بۆ دروستكردنی ماددەی هۆشبەر بەکاردەهێندرێت، ئەوان چەند كەسێك بوون كە بەهۆی رێڕەوی لێكۆڵینەوەكان ناتوانین ژمارەیان ئاشكرا بكەین، بەڵام لە هەردوو رەگەز لە نێویاندا بوون.