من ونی منویسووە
وەرمەکێم گرد ڕاس گێڵێ
ژیوای شیعرێ بێ جە گڵوێزی
ڕۆژهەڵات تۆپەڵێ گوون
گێرا ترەمپی کەردەبۆ
سوورەهەراڵە داڎ مەڎۆ
پەڕنا دەمەترێشتێ
وێژەن نا ونیم چەنە چکۆ
ونی/خوێن/الدم/خون ...
بووەو ونیم یاۆ لاو خوڎاڵەی
مەراقەکێم ڕیزێ کەلیمێ درێژێنێ
مشتێ چەقالێ تاڵێنێ
نە ئۆمەتوو محەمەڎی
نە غەیروو محەمەڎیچ کەراشا شێعرە
نە تام نە بووەشا کەرا !
"بێکەس مننا کەسێ جە زوانیم حاڵی بۆ نیا "
من زمسانێ تووشنە پەیڎا بیا
وەهارەتڕە مەوانۆمۆ
کۆدم لاو وێچمۆ نیا
پەی ئینەی ونیەیۆ مشۆ کۆدت بۆ
کۆد
کۆد
کۆد
من گردچێوم هەن کۆد، نەبۆ
کۆد گردکەسی مشناسۆ، من نەبۆ
کۆد پەی گردکەسی کریۆوە، من نەبوو
من گرد چێوێ کەرووە، کۆد نەبۆ
من لکەکۆرێ ژیواینا
دڎانی تیژێ
ناخوونێ تیژێ
شلم کەرا و وێم تن بووە
تننم کەراوەو شل بووە
نە تننیم تننیی خەڵکی
نە شلیم ئۆمەتوو محەمەڎی مشۆ
ئننەم ڕشیاناوە وێمرە بەشوو پەینوو گردوو دنیێ
بە مردایرە گمێز کەروو
ونجەنەکەمم پەی مەبەسیۆوە
خوو بە وێم بە شمە
داخیێ دەعموو "bm"انە بە کیسەڵی ملوو سەیران
هیچ مەبەروو چەنی وێم
مەراق کەروو تووڵە هەنارێرە و بە کاڵی وەرووش
جووجە کەباب نا، مەراق
داخیێ چەربی و ورگینە
یەکشەممە و یەرەشەممە ڕۆچێنا
خوڎا قبووڵش نەکەری
مەراق وێژەنەتاڵەن وەنەو بەڎەنیمۆ چکۆرە
ئی تەنیاییەو منە قەرەباڵغیێ کوشندەن
کێ حبەو قەرەباڵغی شکە بەرۆ؟
"چەم گلش کەرد مشۆ بەرش باری "
چێ وەشی وزیان مجەمێدە
هینوو پاروپێرارین
مشۆ گەرم کریۆوە
مشۆ وەردریۆ، بەستەنش
تا ئی هانووهوونە کریۆ
گردجارێ لتێ وێم وەروو
کاڵوخام، تاموو وێم کەروو
ئای جە بێتامیم
تۆیچ وێت وەرە تا نەواردەنیشا
ئجۆ چەکوشوو خوڎایم نەکەوتەن
ئجۆ جبەروو کاتیوە
دلێ ناشۆنینە وەش بیەنا
ئەیۆب کرمی سەرشۆ و
من سەروو کرماوە ژیوو
هەوارم زێرابێ کۆنا و
پاڵمدان پشتییەو هیچیوە
هومێڎ لاکێ تۆپان لامنە و
بووەکێش ڕەمنۆم و ئاوراییم مارۆمۆ سەرش
قسێ کناچە ڕەفێقەکام
مشتێ زەڕ بێنێ و هیچی تەر
مەمێشا تۆپەڵێ سەورۆ
قۆلانچێ مۆدێڕنەی خڕ کەردێبێنێ و
هیچی تەر
نە یاوێ بە من و
نە مۆدێرنێ بیێ
ژیوای خول خول، خل کەردێوە
نە زەماونڎەشانە خڕێ بەلەرزانێ "عوسمان"یشا ژنی و
نە قریوێ درێژوو "حەمە هەورامی "
سەرۆ واتم، گوو بە هۆمێڎی
گردش قوربانەو چێشی بۆ
وێتا واچدێش .