بەتۆمەتی ساختەکاری بەڕێوەبەرانی مەرزی نێودەوڵەتی پەروێزخان و گومرگی گەرمیان دەستبەسەرکران.
پەیامنێری تۆڕی هەواڵی ژیان لە گەرمیان رایگەیاند، دوای ئەوەی هەفتەی رابردوو دادگای قۆرەتوو بڕیاری دەستگیرکردنی بۆ عەلی تۆفیق بەڕێوەبەری گشتی مەرزی نێودەوڵەتی پەروێزخان و حسێن ئەحمەد بەڕێوەبەری گومرگی گەرمیان دەرکردووە، ئەمڕۆ یەکشەممە ٢٤ی١ی٢٠٢١، هەردوو بەڕێوەبەرەکە چوونەتە بەردەم دادگا.
ئاماژەی بەوەشکرد، ئەمڕۆ دادوەری دادگای قۆرەتو بڕیاری دەستبەسەرکردنی ئەو دوو بەڕێوەبەرەی داوە و لە ئێستادا راگیراون.
ئەوەشی خستەروو، بەپێی هەندێک لە سەرچاوەکان، راگرتنی ئەو دوو بەڕێوەبەرە بەپێی ماددەی ٢٨٩ ساختەکارییە و هەندێکی تریش ئاماژە بەوە دەکەن کە بەپێی ماددەی ١٩٤ی یاسای گومرگی دەستبەسەرکراون.
پەیامنێری تۆڕی هەواڵی ژیان راشیگەیاند، پەڕاوی لێکۆڵینەوە لە رووداوەکە کراوەتەوە و لێکۆڵینەوە لەگەڵ عەلی تۆفیق بەڕێوەبەری گشتی مەرزی نێودەوڵەتی پەروێزخان و حسێن ئەحمەد بەڕێوەبەری گومرگی گەرمیان بەردەوامە.
ئەوەش لە کاتێکدایە، لە ماوەی رابردوودا و بە تۆمەتی ساختەکاری، محەمەد شێخ وەهاب ئەندامی ئەنجومەنی پارێزگای سلێمانی و باوکی ناوبراو و ژمارەیەک بازرگان لە گەرمیان دەستبەسەرکراون.