رێکخەری ژوری رۆژنامەوانی بزوتنەوەی گۆڕان رایگەیاند ئەوان هەڵوێستیان نەگۆڕە و لەگەڵ رێکەوتنی هەرێم و بەغدان.
دلێر عەبدولخالق لە کۆنفرانسێکی رۆژنامەوانیدا ڕایگەیاند لە کۆبونەوەی نائاسایی جڤاتی نیشتیمانیدا تاوتوێ دۆخی سیاسی و ئابوری عێراقیان کردوە و پێیانوایە دەبێت حکومەتی هەرێم خۆی بۆ ئەگەری رێککنەوتن لەگەڵ بەغدا ئامادەبکات.
وتیشی دەبێت قەناعەت بە خەڵک بکەین و داهاتەکان شەفاف بن،چونکە فەرمانبەران مافی خۆیانە لەکاتی خۆی موچە وەرگرن.
دلێر عەبدولخالق ئەوەشی وت جڤاتی نیشتیمانی بە زۆرینەی دەنگ بڕیاریداوە شوێنەکانی جەلال جەوهەر و عەدنان عوسمان و شەماڵ عەبدولوەفا پڕبکاتەوە.
وتیشی بە نامەیەکی فەرمی جڤاتی نیشتیمانی سوپاسنامەیان ئاراستەدەکەین بۆ ئەو ماوەیەی لەگەڵ بزوتنەوەی گۆڕان کاریان کردوە.
ئاشکراشیکرد هەموو ئۆرگانەکانی بزوتنەوەی گۆڕان پێویستە پابەندی سیاسەتی گۆڕان بن و هەر ڕێوشوێنێکیش بگیرێتەبەر لە چوارچێوەی دەستوری ناوخۆی گۆڕاندا دەبێت.
ئەوە لەکاتێکدایە لەماوەی ڕابردوودا سێ ئەندامی خانەی ڕاپەڕاندنی گۆران بەهۆی نیگەرانیان لە ئەدائی کاری بزوتنەوەکە دەستیان لەکارکێشایەوە.