لە نامەیەکدا کە لەلایەن ٣٧ رێکخراو لەوانەش، چاودێری مافی مرۆڤ، کەمپەینی مافی مرۆڤی ئێران، لێبوردنی نێودەوڵەتی و رێکخراوی مافی مرۆڤی کوردستان ئیمزاکراوە، ئاماژە بەوە کراوە کە تاوەکو ئێستا بەرپرسانی ئێران هیچ زانیارییەکان لەبارەی هۆکاری دەستبەسەرکردنی چالاکانی مەدەنی و سیاسی رۆژهەڵاتی کوردستان بڵاونەکردووەتەوە، کە لە چەند هەفتەی رابردوودا دەستبەسەرکراون، بۆیە بەتوندی نیگەرانی خۆیان لەوبارەیەوە دەربڕیوە و رایانگەیاندووە، پێدەچێت لە داهاتوودا ئەو کەسانە لەڕێگەی دانپێدانانی زۆرەملێوە، سزای توندیان بەسەردا بسەپێنرێت.

هەر لە نامەکەدا هاتووە کە لە نێوان ئەو کەسانەدا، لانیکەم ٤٠ کەسیان تاوەکو ئێستا بیسەروشوێنن و دەزگا ئەمنییەکانی ئێران، زانیاری دەربارەی چارەنوس و شوێنی مانەوەیان نادەن بە کەسوکاریان.

ئەو ٣٧ رێکخراوە رەخنەیان لە پێشێلکاری مافی مرۆڤ لە ئێران گرتووە و رایانگەیاندووە، ئەو جۆرە رەشبگیرییە و سەرکوتی سیستماتیکی چالاکان لە رۆژهەڵاتی کوردستان، ئاگادارنەبوون لە چارەنووسیان و ئازار و ئەشکەنجەدانیان لەلایەن ناوەندە ئەمنییەکانی ئێرانەوە بۆ وەرگرتنی دانپێدانانی زۆرەملێ، دەبێت بە جددی ئیدانە بکرێت و لەلایەن رێکخراوە نێودەوڵەتییەکانەوە تاوتوێ بکرێت.

نزیکەی مانگێکە شەپۆلێک لە دەستبەسەرکردن و بانگهێشتکردنی چالاکان و خوێندکارانی کورد لە شارەکانی مهاباد، مەریوان، ڕەبەت، سنە، بۆکان، سەوڵاوا، نەغەدە، پیرانشار، سەقز، بانە، کرماشان، شنۆ، جوانڕۆ و پاوە لەلایەن هێزە ئەمنییەکانی ئێرانەوە دەستیپێکردووە و بەپێی میدیاکانی رۆژهەڵاتی کوردستانیش، تاوەکو ئێستا نزیکەی ١١٠ کەس دەستبەسەرکراون.

دژی دەستگیرکردنی ئەو کەسانە کەمپەینێک لە تۆڕە کۆمەڵایەتییەکان راگەیەندراوە کە داوا لە رێکخراوەکانی مافی مرۆڤ دەکەن لەسەر ئەو پرسە بێنەدەنگ و داوا لە ئێران بکەن، دەستگیرکراون ئازاد بکات و کۆتایی بەو رەشبگیرییە بهێنێت.