لەماوەی مانگی ڕابردوودا لانیکەم ١٦ کۆڵبەر و کاسبکار لە سنورەکانی رۆژهەڵاتی کوردستان کوژراون و برینداربوون.
بەپێی ئاماری ڕێکخراوی مافی مرۆڤی هەنگاو، لە مانگی شوباتی رابردوودا، ٧ کۆڵبەر و کاسبکار لە سنورەکانی رۆژهەڵاتی کوردستان کوژراون و ٩ کۆڵبەریش برینداربوون، کە ٥٦٪ی ئەو حاڵەتانە بە تەقەی ڕاستەوخۆی هێزە ئەمنییەکانی ئێران بووە .
ئاماژەی بەوەشکردووە، زیاترین ژمارەی کوژران و برینداربوونی کۆڵبەران لە پارێزگای سنە تۆمار کراوە کە ١٠ حاڵەت بووە.
روونیشیکردووەتەوە، ٩ حاڵەت بە تەقەی راستەوخۆی هێزە ئەمنییەکانی ئێران بووە کە بریتین لە سێ کوژراو و شەش بریندار.
هەروەک ٧ حاڵەتیش بەهۆی رووداوی سروشتییەوە بووە کە چوار گیان لەدەستدان و سێ بریندار بووە.
رێکخراوی مافی مرۆڤی هەنگاو راشیگەیاندووە، چوار حاڵەت لە پارێزگای ورمێ بووە کە هەر چواریان کوژراون، ١٠ حاڵەت لە پارێزگای سنە بووە لە سێ کوژراو و حەوت برینداربوون و دوو حاڵەتی برینداربوونیش لە پارێزگای کرماشان بووە.