ساڵی ١٩٩٥ ئەو قۆناغەی بە دوای ئیشی هونەرییدا دەگەرام، چوومە کارگەی (ڕایمۆند کیتڵ)لە شاری دۆسلدۆرف لە ئەڵمانیا، کابرای خاوەن کارگەکە پرۆفسۆر بوو، لە ئەکادیمیای (دۆسلدۆرف) لێی پرسیم: دەزانی پەیکەر دروست بکەیت؟ گوتم: بەڵێ .

لە دڵی خۆمدا گوتم ئەگەر دۆخی سیاسی و خاوەنی وڵاتی خۆم دەبووم ، ئێستا وەك تۆ پڕۆفیسۆری هونەر بووم لە زانکۆ .

پاشان کە ئیشم کرد، زانی شارەزایی و سەلیقە و ئەزموونێکی باشم هەیە، چیتر ڕێزی تایبەتی دەگرتم و مامەڵەیەکی جیاوازی لەگەڵ دەکردم .

لەو کاتانەدا کۆمەڵێك پرۆژە و پەیکەری مەزنیان بۆ هاتبوو، لەوانە پرۆژەی (جنۆکە مەزنەکان) ئەم پەیکەرانە نزیکی ٢٠ دانەم لێدرستکردوون، لە ماوەی ٦ ساڵدا بە قەبارەی ٣ مەتر تاکو ٦ مەتر، لەماددەی بۆرەك و گەچ مۆدێلەکانیانم دروست دەکرد، دوایی لەم کارگەیە قاڵبی لمیان بۆ دروست دەکردن و لە ماددەی برۆنز و ئەلەمینیۆم و ئاسن و هەندێجار بە ستیلیش دادەڕێژران .

جا ئەو ٢٠ پەیکەرە لەبەر گرنگی و بایەخی هونەرییان هەر دانەیەکیان چەندەها جار کۆپی کراوەتەوە و فرۆشراون، لە زۆربەی گەلەری و مۆزەخانە و شوێنە گشتییەکانی جیهان نیشاندراون .

سەرجەمیشیان تایبەت بۆ کارگەی دروستکردنی پەیکەر و داڕشتنی کانزاکان (ڕایمۆند کیتڵ و دوایی بو بە کارگەی ڕٶلف کایزەر) لە شاری دۆسلدۆرف لە ئەڵمانیا بوون، کە پرۆژە و کاری زۆرێك لە هونەرمەندە بەناوبانگەکانی جیهانیان دروستکردوە، لەوانە (تۆنیکرێگی بەریتانی و تۆماس شوتەی ئەڵمانی، کاتەرینا فریچ ، مەگدەلینا ئەبەکانۆڤیج و زۆری دیکە...)