سۆرانی  |  بادینی  |  English      

سواڵی سواڵکەر بۆ نۆکەر!

  22/04/2021  |    1273 جار خوێندراوەتەوە

رێبوار کەریم وەلی

ئەگەرچی قانونی نوێی هەڵبژاردنی بەغدا پڕ بەدڵی پارتی و یەکێتییە، کەچی چەند خاڵێک هەن کە ئەو دڵخۆشییەی لێتێکداون و سەبەبی قەلەقین.

*

بەنسبەت پارتی و یەکێتی راستە کە ئەمجارە رێژەی بەشداریکردنی خەڵک کاریگەریی بەسەر ئەنجامەوە نابێ، بەڵام راستییەکەی ئەوەیە کە هەر لایەنێک خۆی لە بەرەی بایکۆتکردنەوە بکاتە خاوەن دەبێتە براوەی بێ کورسی.

*

قەلەقییەکی دیکە رەنگبێ تەزویر بێت ئەگەر بە رێککەوتنێکی هاوبەش نەکرێت؛ سیستەمەکە لە سۆنگەی ئیفلاسی سیاسی و جەماوەریی حزبە ئۆپۆزیسیۆنەکانی رابردوو، بە دەیانهەزار دەنگی سەرگەردانی کۆڕۆنا گرتووی حزبەکانی دیکەی لەسەر سینیی زێڕ داناوە. ئەو دەنگانە چاوەڕێی ئەوە نین بچنە ناو هیچ سندوقێکەوە، بەڵام گرفت ئەوەیە چۆن بتوانرێ لە سوچێکی سندوق قەرەنتینیان بکەن؟ هاوکات بیانکەن بە پێوەرێک بۆ ژمارەی دەنگەکانیان لە هەڵبژاردنی داهاتووی کوردستاندا!؟

*

بەنسبەت یەکێتی کە کۆنگرەی کردووە و تاڕاددەیەک سنوری بەرپرسیاریەتی و بڕیاردانیان لە ناوچە جیاجیاکاندا دابەش کردووە، جارێ لە رووی ناوخۆییەوە کێشمەکێشێکی ئەوتۆ لە ئارادا نییە. بەتایبەتیش کە ئیتر کێشەی بەرهەم ساڵحیشیان نەماوە، بەڵام بە نسبەت پارتی، سەنگی مەحەک کۆنگرەی چاوەڕوانکراوە کە تا چ راددەیەک دەتوانێ ناوماڵی پارتی بە تۆکمەیی رابگرێت.

*

رەنگبێ لە رووی سیاسییەوە هینە قۆڕەکەی ئەم هەڵبژاردنانە و تەئەمولی قوڵ، جۆری مامەڵەی هەردوو حزب لەگەڵ بزووتنەوەی گۆڕان بێت.

گۆڕان تەنانەت گۆڕانی هەڵبژاردنەکانی رابردووش نییە تا لەسەر بنەمای ئەو دەنگانەی هەیبووە مامەڵەی لەگەڵدا بکرێت.

*

پارتی بۆ حوکمی ناوەندی و یەکێتیش بۆ حوکمی ناوچەیی پێویستییان پێیە، بەڵام لە راستیدا، بە پێی داتاکانی هەڵبژاردنی پێشووش بێت، بەو سیستەمەی ئێستا، هەرکەس یەک کورسیش بدات بە گۆڕان دەبێ وایدابنێ لە گیرفانی خۆی و لە مایەکەی بەخشیویەتی! بەتایبەتیش ئەگەر هەندێک لە فیگەرە ناڕازییەکانی گۆڕان خۆیان کاندید بکەن، رەنگبێ رێکەوتنیش دادیان نەدات.

*

راستییەکەی کەس حاڵی بە حاڵی گۆڕانی سێ جار کۆیلە(ساحێبخانووەکان، پارتی و یەکێتی) نەبێت. تراژێدیایەکی سیاسیی حەزین و ئیمپراتۆرییەتێکی دەرۆزەکەر لە دەرۆزەکەران...ئەلفاتیحا!

 


زیاتر