سۆرانی  |  بادینی  |  English      

کەرکوک.. بیرە نەوتێک تەقێنرایەوە

  2021-04-17  | 
 سۆران عەبدولکەریم
سەرچاوەیەک لە پۆلیسی پاراستنی کێڵگە نەوتییەکان بە تۆڕی هەواڵی ژیانی راگەیاند، لەلایەن کەسانی نەناسراوەوە بیرەنەوتێکی کێڵگەی بای حەسەن تەقێنراوەتەوە و دواتر ئاگرەکەی کۆنتڕۆڵکراوە.

سەرچاوەیەک لە پۆلیسی پاراستنی کێڵگە نەوتییەکان بە تۆڕی هەواڵی ژیانی وت، کە تەقینەوەکە لەرێگای بۆمبی چێنراوەوە بووە و بیری ژمارە ١٠٥ی بای حەسەن تەقێندراوەتەوە.

وتیشی، ئەنجامدەرانی ئەو کارە نەناسراون و جارێ دیار نییە کە کێ ئەو کارەی ئەنجامداوە.

ئەو سەرچاوەیە باسی لەوەشکرد، بیرەکە غازی کەمبووە، بۆیە ئاگرەکەی زۆر نەبووە و توانراوە کۆنتڕۆڵ بکرێت.

راشیگەیاند، لە ئێستادا لێکۆڵینەوە لە رووداوەکە دەستیپێکردووە و بەدوای ئەنجامدەرانی کارەکەدا دەگەڕێن.

کێڵگەکە لە ١٩٦ بیرە نەوت پێکدێت و پاراستنی ئاسایشیان بەگرێبەست بە دانیشتووانی گوندەکە سپێردراوە، گوندەکە ناوی بای حەسەنە و کێڵگەکەش هەر بەناوی گوندەکەوەیە.