سۆرانی  |  بادینی  |  English      

ئاڵدار خەلیل: ئەوانەی دوێنی داعش بوون، ئەمڕۆ لە هەولێر پێشوازیان لێدەکرێت

  2021-03-03  | 
 تۆڕی هەواڵی ژیان
هاوسەرۆكایەتی پەیەدە رایگەیاند، ئەو داعشانەی پێش سێ ساڵ بە كیلۆمەترێك نزیكی هەولێر بوونەوە ئەمڕۆ بە گەرمی پێشوازیان لێدەكرێت.

دوای سەردانی نەسر حەریری، سەرۆكی هاوپەیمانی هێزەكانی ئۆپۆزسیۆنی سوریا بۆ هەرێمی كوردستان و كۆبوونەوەی لەگەڵ مەسعود بارزانی سەرۆكی پارتی دیموكراتی كوردستان كاردانەوەی پەیەدەی لێكەوتەوە. 

ئاڵدار خەلیل ئەندامی دەستەی هاوسەرۆكایەتی پارتی یەكێتی دیموكراتی سوریا لە تویتێكدا رایگەیاند: ئەو هێزانەی بەشداری جینۆساید و ئاوارەكردنی خەڵكی رۆژئاوای كوردستان بوون ئێستا لە هەولێر وەك سیاسەتمەدار و دتپلۆماتكار پێشوازیان لێدەكرێت. 

بەرپرسەكەی پەیەدە راشیگەیاند "چەتە و تیرۆریسەكانی كە گەلی عەفرینیان كۆچبەر كرد و جینۆسایدیان لەسەر ئەنجامدان، هەمانشتیان لە سەرێ كانی و گرێ سپی كرد بە جلی سیاسەتمەدار و و دیبلۆماتەوە دەچنە هەولێر". 

نەسر حەریری بە سەردانێكی سێ ڕۆژە لەگەڵ حەمید دەربەندی بەرپرسی دۆسیەی سیاسی سوریا لە سەرۆكایەتی هەرێمی كوردستان كۆبووەتەوە و گفتوگۆیانكردووە دەربارەی دۆخی مەیدانی و سیاسی سوریا و دۆسیەی ئاوارەكان. 

ئەوەش لە كاتێكدایە كە هاوپەیمانی هێزە ئۆپۆزسیۆنەكانی سوریا لە كاتی هێرشی توركیا بۆسەر رۆژئاوای كوردستان هێزە سەربازیەكانیانی ئەو گروپانە لە دژی هەسەدە شەڕیان كرد.