سەرۆکی کۆمەڵی دادگەری کوردستان سەبارەت بەدۆخی ئێستای سیاسی هەرێمی کوردستان هۆشداری دەدات و دەڵێت، "شکاندنی شکۆی دامەزراوەکانی هەرێمی کوردستان، هۆکاری پووکانەوەی هەرێم و بێ ئیعتیبارکردنیەتی و، شیعاری بێ کرداریش دادی کەس نادات و، هیچ دەردێک چارەسەر ناکات".
دەقی پەیامی عەلی باپیر سەرۆکی کۆمەڵی دادگەری کوردستان:
دۆخی ئێستای هەرێم و چەند هۆشدارییەک بۆ هەموو لایەک
١- شکاندنی شکۆی دامەزراوەکانی هەرێمی کوردستان، هۆکاری پووکانەوەی هەرێم و بێ ئیعتیبارکردنیەتی و، شیعاری بێ کرداریش دادی کەس نادات و، هیچ دەردێک چارەسەر ناکات.
٢- پێویستە بۆ مانەوە و بەردەوامیی هەرێم، هەموومان پابەندی پڕەنسیپ و یاسایەکان بین و، هیچ لایەنێک پەرلەمان و حکوومەت بە هی خۆی و حیزبەکەی نەزانێ، چونکە لە ئەسڵدا هەرێم و دامەزراوەکانی هی هەموو خەڵکین.
٣- سەپاندنی دۆخێکی تایبەت بەسەر هەرێمدا، دژی بنەمایەکانی تەبایی و پێکەوە ژیان و، سازانی نیشتمانیی و، ڕێز لەیەکدی گرتنەو، هیچ بەرهەمێکی چاکی لێ ناچنرێتەوە.
٤- کەواتە: با عیبڕەت و پەند لە هەڵەکانی ڕابردوومان و شێوەی ئیدارەدانی خراپی وڵاتمان وەربگرین و، چیدی خۆمان ئیحڕاجی ئەملاولا نەکەین و، بزانین کە بەبێ ڕێککەوتن و سازانی نیشتمانیی، لەسەر چۆنیەتیی هەڵبژاردن و، هەموارکردنی یاسایەکەی و، کاراکردنەوەی کۆمیسیۆن، کە هیچ گومانێک هەڵنەگرێ، هیچ چارەیەکی دیکەمان نیە و، گوتراویشە : (ومن چاق بە العدل فالجور علیە ڕچیق)، هەرکەس بە دادگەریی سەغڵەت ببێ، بە ستەم، زۆر سەغڵەتتر دەبێ.
عەلی باپیر
سەرۆکی کۆمەڵی دادگەریی