بەبۆنەی خنکانی ژمارەیەک هاوڵاتی هەرێمی کوردستان لە ئاوەکانی سنوری ئیتاڵیا، سەرۆکی یەکێتی نیشتمانی کوردستان پەیامێکی بڵاوکردەوە و رایگەیاند، "گیانلەدەستدانی ژمارەیەک هاونیشتمانی لە سنووری ئیتاڵیا، خەمێکی گەورەیە و لە دڵەوە نیگەرانین".
بافڵ جەلال تاڵەبانی سەرۆکی یەکێتیی نیشتمانیی کوردستان ئاماژەی بەوەشدوە، " پرسە و هاوخەمیی قووڵی خۆمان ئاڕاستەی خێزان و کەسوکارە بەڕێزەکانیان دەکەم و هاوبەشی ئەم ماتەمەین".
باسی لەوەشکردوە، "چەندبارەبوونەوەی ئەم رووداوە ناخهەژێنانە مایەی بەخۆداچوونەوە و راچڵەکینێکی گەورەیە تاوەکو بەرپرسیارانەتر مامەڵە بکەین، لەژێر سایەی حوکمڕانییەکی تەندروستدا ژیانێکی شایستەتر بۆ خەڵکەکەمان دابین بکەین و چیتر گەنجەکانمان کە گەورەترین سەرمایەی نیشتمانن نائومێدنەکرێن".
لە کۆتایی پەیامەکەیدا سەرۆکی یەکێتی دەڵێت، "لە خوای گەورە داواکارین قوربانیان بە بەهەشتی بەرین شادبکات و سەبووری و ئارامی بەهەموولایەک ببەخشێت".