دەقی نامەکە..

نامەیەکی کراوە بۆ مەرجەعی باڵا بەڕێز سەماحەتی عەلی حسێنی ئەلسیستانی
لەکوردستانەوە، کوردستانی لێبوردەیی و پێکەوەژیان، کوردستانی ستەمدیدەو جینۆسایدکراوی دەستی رژێمی سەدام، سڵاو و رێزی بێپایان پێشکەشی سەماحەتتان دەکەین، نزای تەمەن درێژیتان بۆ دەکەین.
لای هەمووان شاراوە نیە، کە مەرجەعی باڵا، لەدوای (٢٠٠٣)ەوە هەتا ئێستا هەمیشە لەمەسەلە چارەنوسازەکان و کێشە و موعاناتی گەلانی عێراقدا، رۆڵی خێر و ئاشتەوایی و پارێزەری بەرژەوەندی گەلانی عێراق بووە. ئێمەی گەلی کورد هەمیشە ئومێد و هیوای گەورەمان بەبەرێزتان بووە، کە لەدۆخە سەختەکاندا قسەی چارەنوساز دەکەن.
لەکاتێکدا ئەم نامەیە دەگەیەنین بە سەماحەتتان، خوشک و براکانتان و رۆڵەکانی گەلی کوردستان لە دۆخێکی بژێوی زۆر سەختدان، زیاتر لە (٩٠) ڕۆژە مووچەیان وەرنەگرتوە، مووچەخۆرو خانەنیشنان و پێشمەرگە و ئەو رۆڵە قارەمانانەی کە رژێمی بەعس و تیرۆریستانی داعشیان شکاند بێمووچەن، مناڵ و نەخۆش و پیرو پەککەوتە بێ شیر و بێ دەرمان و گوزەرانیان زۆر سەختە، کەسوکاری شەهیدان و قوربانیانی دەستی ستەمی بەعس بێ مووچەن.
خەڵکی مەزڵومی کوردستان بوونەتە قوربانی ململانێیە سیاسیەکان و ژیان و قووتیان بووەتە بارمتە و کارتی فشاری سیاسیەکان بەرامبەر بەیەکتر، لەکاتێکدا دەستوری عێراق و بڕیارەکانی دادگای فیدرالی و یاسای بودجەی گشتی عێراق کێشەی مووچەی خەڵکی کوردستانیان یەکلاکردۆتەوە. کۆبونەوەو دانوستاندنی دوورو درێژ و بێ ئەنجام خەڵکی کوردستانی هێندەی تر نیگەران و بێ هیوا کردووە.
داوا لەسەماحەتتان دەکەین، وەکو چۆن لە رابوردوی دوور و نزیکدا، رۆڵی گەورەتان لە قووڵکردنەوەی پێکەوەژیان و چارەسەرکردنی کێشەکان هەبووە، بەو شێوەیەش بێنەسەر خەت و پەیامی یەکلاکەرەوە بدەن بە سیاسیەکان، ئەم کێشەیە لەبنەڕەتەوە چارەسەر بکەن و مووچە و قووتی خەڵکی کوردستان نەکەنە کەرەستەی ململانێی سیاسی، مووچە خەرج بکرێ و کێشە سیاسی و ئیداریەکانیش بەپێی دەستورو یاسا لەرێگای دامەزراوە نیشتمانی و فیدرالیەکانەوە چارەسەر بکرێ.
لەگەڵ رێزی بێپایانمان، خوای گەورە تەمەن درێژ و تەندروستتان بکات.
کاروان عەلی یاروەیس
پەرلەمانتاری عێراق
٢٠ / ٨ / ٢٠٢٥ سلێمانی