ئه‌ندامێكی فراكسیۆنی پارتی له په‌رله‌مانی عێراق ده‌ڵێت، شاندی حكوومه‌تی هه‌رێم هه‌ر له به‌غدان و ئه‌گه‌ری زۆره له ماوه‌ی 24 كاتژمێری داهاتوودا رێككه‌وتن له‌سه‌ر ئه‌و خاڵه‌ش بكرێت كه ماوه‌تەوە و په‌یوه‌ندی به داهاتی نانه‌وتییه‌وه هه‌یه.
شێروان دووبه‌ردانی، ئه‌ندامی فراكسیۆنی پارتی له په‌رله‌مانی عێراق ڕایگەیاند، دوو له مه‌رجه‌كانی ناردنی مووچه‌ی مانگی شه‌شی فه‌رمانبه‌ران رێككه‌وتنی كۆتایی له‌سه‌ر كراوه، ته‌نیا داهاتی نانه‌وتیی ماوه. ئێستا شاندی حكومه‌تی هه‌رێم هه‌ر له به‌غدان و ئه‌گه‌ری زۆره له ماوه‌ی 24 كاتژمێری داهاتوودا رێككه‌وتن له‌سه‌ر ئه‌و خاڵه‌ش بكرێت كه ماوه‌تەوە و په‌یوه‌ندی به داهاتی نانه‌وتییه‌وه هه‌یه.
وتیشی، ده‌بێت ته‌یف سامی ئه‌نجامی كۆبوونه‌وه‌كانی ئه‌م دوو رۆژه‌ی شاندی هه‌ولێر و به‌غدا به نووسراوێك به‌یانی بباته كۆبوونه‌وه‌ی ئه‌نجوومه‌نی وه‌زیران تا گفتوگۆی له‌باره‌وه بكرێت، به‌دڵنیاییه‌وه ئه‌گه‌ر نووسراوه‌كه ئه‌رێنی بێت ئه‌وا هه‌ر به‌یانی ئه‌نجوومه‌نی وه‌زیران داوا ده‌كات كه وه‌زاره‌تی دارایی عێراق و ته‌یف سامی ته‌مویلی مووچه بكات.
ئاماژەی بەوەشکردووە، له ماوه‌ی 24 كاتژمێری داهاتوودا بابه‌ته‌كه ته‌واو یه‌كلایی ده‌بێته‌وه و ئه‌گه‌ری زۆره به‌یانی له كۆبوونه‌وه‌ی ئه‌نجوومه‌نی وه‌زیرانی عێراق بڕیاری ته‌مویلی مووچه‌ی مانگی شه‌ش بدرێت.