عەبدوڵا ئۆجەلان بە بۆنەی یەکی ئەیلوول ڕۆژی جیهانیی ئاشتییەوە پەیامێکی بڵاوکردەوە،
لە پەیامەکەیدا عەبدوڵا ئۆجەلان ئاماژەی بەوەکردووە، کە "بانگەوازەکەمان بۆ ئاشتی و چارەسەری دیموکراسی، هەنگاوێکی سیاسیی ئاسایی نییە، بەڵکو هەنگاوێکی ستراتیژیی و قۆناغێکی مێژووییە".
ئۆجەلان، جەختی لەوە کردەوە، کە ئاشتییەکی ڕاستەقینە، تەنیا بە بێدەنگکردنی چەک و کۆتاییهاتنی شەڕ و پێکدادان، بە دی نایەت. هەر کاتێک ئازادی، دیموکراسی و دادپەروەری هەموو بوارەکانی ژیانی گرتەوە، ئەوکات ئاشتییەکی ڕاستەقینە دێتە دی.
دەشڵێت، هەم لە تورکیا و هەم لە سەرانسەری ڕۆژهەڵاتی ناوەڕاست، دەرگای سەردەمێکی نوێ کراوەتەوە، تاوەکو ژیانی ئاشتییانە و دیموکراسی جێگەی شەڕ و وێرانکاریی بگرێتەوە، ئەمە تەنیا داخوازییەک نییە، بەڵکو ڕاستییەکی بەرجەستەیە و پێویستە بە هەلی بەهێز و هەنگاوی پراکتیکی بە دی بهێنرێت.