ئێوارەی ئەمڕۆ لە یاریگای فرەنسۆ هەریری عەبدوڵا کوردی باوکی ئالانی تەمەن سێ ساڵ کە ساڵی 2015 لە کەناراوەکانی تورکیا خنکا، چاوی بە پاپای ڤاتیکان کەوت و وێنەیەکی ئالانی پێشکەشکرد.
بەپێی هەواڵێکی ماڵپەڕی ڤاتیکان نیوز پاپا گوێی لە ئازاری باوکی ئالان گرتووە کە بەهۆی لەدەستدانی کوڕەکەیەوە چەشتویەتی و خەمی قوڵی خۆی بۆ دەربڕیووە.
باوکی ئالانیش سوپاسی پاپای کرد کە کاتی خۆی پشتگیری لە کۆچبەران کردوە و لەهەمانکاتدا وێنەیەکی کێشراوی ئالانی کوڕی پێشکەشی پاپا کرد.
ئالانی تەمەن سێ ساڵ لە مانگی ئەیلولی 2015 وەک هەزاران خێزانی دیکەی رۆژئاوای کوردستان و سوریا ویستیان لە تورکیاوە بچنە وڵاتانی ئەوروپا بەڵام بەلەمەکەیان تێکشکا و گیانی لەدەستدا.
دواتر وێنەی جەستەی ئالان کە لەنێو لمەکەدا بوو،بوو بە تراژیدیایەکی جیهانی و گوزارشتی لە کێشەو خەمی گەورەی کۆچبەران لە جیهان کرد.
دواتر تەرمی ئالان و برایەکەی و دایکی پێکەوە بەخاکسپێردران و چیرۆکەکەشی بوو بە بابەتی گەرمی سەرجەم وڵاتانی جیهان.
ئالان و خێزانەکی خەڵکی رۆژئاوای کوردستان بوون و بەهۆی شەڕی ناوخۆی سوریا و نەهامەتی و ئاوارەبوونەوە ویستیان کۆچبکەن بۆ وڵاتانی ئەوروپا.
پاپا فرەنسیس پاپای ڤاتیکان ئەمڕۆ سەرلەبەیانی گەیشتە هەرێمی کوردستان و دوای پێشوازیکردنی لە فڕۆکەخانە سەردانی شاری موسڵ و ناحیەی قەرەقوشی کرد،دواتریش لە یاریگای فرەنسۆ هەریری ڕیوڕەسمێکی گەورەی بۆ ئەنجامدرا و پاشان ئێوارەی ئەمڕۆ گەڕایەوە بەغدا،بڕیارە سبەینێ کۆتایی بە گەشتەکەی بهێنێت و بگەڕێتەوە بۆ ڤاتیکان.
ئەو وێنەی ئالان کە باوکی پێشکەشی پاپای کرد.