لاهور شێخ جەنگی هاوسەرۆکی یەکێتیی نیشتیمانیی کوردستان رایگەیاند، "ئەمڕۆ لە شاری سلێمانی، پێشوازیمان کرد لە وەفدێکی باڵای حکومەتی بەریتانیا کە پێکهاتبوو لە جەیمس هیپی وەزیری دەوڵەت بۆ کاروباری هێزە چەکدارەکان و ستیفن هیکی باڵیۆزی بەریتانیا لە عێراق وجەیمس سۆرنتۆن کونسوڵی گشتیی بەریتانیا لە هەرێمی کوردستان و وەفدێکی هاوڕێیان".

ئاشکراشیکرد،  لە دیدارێکدا گفتوگۆیان کردووە دەربارەی پتەوکردنی پەیوەندییەکانی نێوان هەرێمی کوردستان و بەریتانیا و گۆڕانکاریی و پەرەسەندنە سیاسی و ئەمنی و ئابوورییەکان لە عێراق و هەرێمی کوردستان .

 وتیشی، "سوپاسمان کردن کە وڵاتەکەیان ڕۆڵی گرنگی هەبووە لە شەڕی داعش و هاوکاریکردنی هێزەکانی پێشمەرگە لە ڕووی مەشق و ڕاهێنان و هاوکارییە سەربازییەکان، لە ئێستاشدا بەشداریی کارایان هەیە لە پڕۆسەی چاکسازیی و یەکخستنەوەی هێزەکانی پێشمەرگە، ئامادەیی و پشتیوانیی تەواوی خۆمان دووپات کردەوە بۆ یەکخستنەوەی هێزی پێشمەرگە".

هاوسەرۆکی یەکێتیی نیشتیمانیی کوردستان راشیگەیاندووە کە دەبێت ئەو بابەتە یەکلایەنە نەبێت بەڵکو هەمووان هاوکار و پشتیوان بن و بنەمای یەکسانی لەبەرچاو بگیرێت، ئاماژەیان بە بەردەوامی هەڕەشە و مەترسی شانە نوستووەکانی داعش کردووە، لەو ڕووەشەوە گرنگی مانەوە و بەردەوامی هێزەکانی هاوپەیمانی نێودەوڵەتی-یان لە عێراق، بە پێویست زانیوە.

هەر لە دیدارەکەدا لاهور شێخ جەنگی جەختیکردووەتەوە لەسەر هاوئاهەنگیی نێوان هێز و لایەنە سیاسییەکان بۆ ڕەخساندنی زەمینەیەکی لەبار و دۆخێکی سەقامگیر بۆ ئەوەی پڕۆسەی هەڵبژاردنەکانی داهاتوو سەرکەوتوو بێت.

هەروەک باسیان لەو هەوڵانە کرد کە وەک یەکێتیی نیشتیمانیی کوردستان لە سۆنگەی پەرۆشیان و خزمەتکردنی میللەتەکەیان، هەوڵەکانیان دەخەنەگەڕ لە بەغدا بۆ چارەسەرکردنی کێشە هەڵپەسێردراوەکانی نێوان حکومەتی هەرێم و حکومەتی فیدراڵی.

لە بەشێکی تری دیدارەکەدا لاهور شێخ جەنگی هاوسەرۆکی یەکێتیی نیشتیمانیی کوردستان ئاماژەیان بۆ نوێبوونەوەی یەکێتیی کردووە کە لە دوای ئەنجامدانی کۆنگرەی چوارەمەوە ئێستا یەکێتییەکی نوێ بە پلان و بەرنامەی نوێوە هەنگاو دەنێت و بە دید و ڕوانینێکی سەردەمیانە هەوڵ دەدات بۆ سەرخستنی پڕۆسەی سیاسیی لە عێراق و هەرێمی کوردستان .