وتەبێژی یەکێتی نیشتمانی کوردستان هەڵوێستی حزبەکەی لەسەر پێکهێنانی حکومەتی نوێی هەرێم رادەگەیەنێت و دەڵێت، " لەسەر ئەو بەڵێنانەمان سوورین، کە لەسەروەختی بانگەشەی هەڵبژاردندا بە دەنگدەرانمان داوە".
سەعدی ئەحمەد پیرە وتەبێژی یەکێتی نیشتمانی کوردستان دەڵێت: بەو بەرنامانەی لە بانگەشەی هەڵبژاردندا بڵاومانکردنەوە، یەکێتی دەچێتە پەرلەمان.
ئاماژەی بەوەشکرد: وەرگرتنی پۆستەکان و دابەشکردنیان بە گفتوگۆ دەکرێت، پێویستە لە ماوەیەکی کورتدا کاربکەین بۆ پێکهێنانی پەرلەمان و حکومەتێکی کارا.
باسی لەوەشکرد: دەرگامان کراوەیە بۆ هەر لایەنێک کە ئامادەی گفتوگۆ بێت، داوای ئێمەش جەختکردنەوەیە لە ڕاستکردنەوەی ڕێرەوی حکومڕانی.