بەبۆنەی سەری ساڵی نوێوە مەکتەبی سیاسی یەکێتی نیشتمانی کوردستان پەیامێکی پیرۆزبایی بڵاوکردەوە و رایگەیاند، "هیوامان وایە ساڵی ٢٠٢٥ ساڵی گەشەی زیاتری پرۆسەی دیموکراتی وڵاتەکەمان و ساڵی دابینکردنی ئیستحقاقە دەستورییەکانی تری کورد بێت".
مەکتەبی سیاسیی یەکێتیی نیشتمانیی کوردستان لە پەیامەکەیدا دەڵێت: ساڵی نوێ لە گەلەکەمان، لە کۆمەڵانی خەڵکی عێراق و جیهان پیرۆز بێت، ساڵی ئاشتی و ئاوەدانی ، ماف و دادپەروەری و چارەسەری رەوای مەسەلەی کورد لە رۆژهەڵاتی ناوەڕاست بێت لەسەروبەندی گۆڕانکاری ناوچەکە ، بە دیالۆگی سیاسیی و ئاشتی و دیموکراتی.
ئاماژەی بەوەشداوە: بۆ کۆمەڵانی خەڵکی کوردستانیش ساڵی بەدیهاتنی ژیان و گوزەرانی باشتر و تێپەڕاندنی دژواری و قەیرانەکانی نێوان هەرێمی کوردستان و بەغدا بێت بە تایبەتی ئیستحقاقی مووچە بە گوێرەی بڕیارەکانی دادگای فیدراڵی، دوور لە تێکەڵکردنی بە دۆسێ سیاسییەکان.
لە پەیامەکەی مەکتەبی سیاسی یەکێتیدا هاتووە: هەر بەو بۆنەوە یەکێتیی نیشتمانیی کوردستان پابەندێتی خۆی بە سیاسەتی ڕاستکردنەوەی رێڕەوی حوکمڕانی و گێرانەوەی هاوسەنگی هێز بۆ ئەزموونەکەمان، هەر وەک بەڵێنی بە خەڵکەکەمان دابوو، دووپات دەکاتەوەو لە هەموو وێستگەکانی ساڵی ٢٠٢٥ یشدا کۆششی ڕەوای بۆ دەکات، بەرەو حوکمڕانی و حکومەتێکی نوێی خزمەتگوزار و بەرپرس و پرۆسەیەکی سیاسیی کاراو دیموکرات و دەربەست.
لەکۆتایدا دەڵێت: هیوامان وایە ساڵی ٢٠٢٥ ساڵی گەشەی زیاتری پرۆسەی دیموکراتی وڵاتەکەمان و ساڵی دابینکردنی ئیستحقاقە دەستورییەکانی تری کورد بێت.