بافڵ جەلال تاڵەبانی سەرۆکی یەکێتیی نیشتمانیی کوردستان لە ساڵیادی شەهیدبوونی، لیوا شێرکۆ فاتیح شوانی و لیوا حوسێن مەنسوور پەیامێکی بڵاوکردەوە و رایگەیاند؛ ئەوان دوو شەهیدی نەمری خەباتی کوردایەتین، رەمزی کوڕانی یەکێتین کە قەت سەنگەریان چۆڵ نەکردووە لەپێناو شکۆی گەلەکەیان.
دەقی پەیامی بافڵ جەلال تاڵەبانی سەرۆکی یەکێتی نیشتمانی کوردستان:
لەیادی دە ساڵەی شەهیدبوونی هەردوو فەرماندەی قارەمان و دیاری گەلەکەمان، لیوا شێرکۆ فاتیح شوانی، لیوا حوسێن مەنسوور و هاوڕێکانیان، سەری رێزو نەوازش دادەنەوێنین و یادو یادەوەرییان بۆ هەمیشە بەرزڕادەگرین.
شەهید شێرکۆ فاتیح شوانی و شەهید حوسێن مەنسوور دوو تێکۆشەری بەوەفای کوردو یەکێتی کە نموونەو سونبولی ئازایەتین کە ئامادەنەبوون سەنگەری بەرگری چۆڵبکەن و هەڵبێن، بەگیان و خوێنی خۆیان ئێمەو کەرکوک قودسی کوردستانیان لە تیرۆریستانی داعش پاراست.
ئەوان دوو شەهیدی نەمری خەباتی کوردایەتین، رەمزی کوڕانی یەکێتین کە قەت سەنگەریان چۆڵ نەکردووە لەپێناو شکۆی گەلەکەیان.
یەکێتی و هەڤاڵەکانتان بۆ ھەمیشە بەڕێزو شکۆوە یادتان دەکەینەوە و هەرگیز لەیادتان ناکەین و درێژەپێدەری رێبازی پیرۆزتان دەبین بۆ پاراستنی گەلەکەمان.
سەربەرزی بۆ کەسوکارتان و درودو سڵاو بۆ گیانی پیرۆزی شەهیدان کاک شێرکۆ فاتیح شوانی و کاک حوسێن مەنسوور و هاوڕێکانیان و سەرجەم شەهیدانی گەلی کوردستان.
بافڵ جەلال تاڵەبانی
سەرۆکی یەکێتیی نیشتمانیی کوردستان