یەکێتی براوەی گەمەکە بوو، چونکە:
-1 پشکی خۆی دەستەبەرکرد لەپێکهاتەی دادگاکە و لەهەمان کاتدا مەترسی بۆ سەر پشکی پارتی دروستکرد.
-2 ئەم هەنگاوەی یەکێتی سەرەتای هاوپەیمانێتی هەڵبژاردنە و ژمارەیەکی قورس دەبێت بۆ چنینەوەی کورسیەکانی پارێزگاکانی سلێمانی و کەرکوک و هەولێر، ئەمەش پێویستی ئەکات لەسەر هێزەکانی تر، بەتایبەتی هێزەکانی ئۆپۆزسیۆن و دەنگە ناڕازییەکان حساباتی وردیی خۆیان بکەن، بەتەحدید لەپارێزگای سلێمانیدا، چونکە دوور نیە دەست بەتاڵ لێی دەربچن.
-3هاوپەیمانیی هیوا هەرچەندە هاوپەیمانێتیەکی فشۆڵە( هش)، بەڵام هەر تەرکیزی خەڵکی لەسەر بووە. یەکێتی بەم جوڵەیەی دەستبەتاڵ فڕێیدایە سەنگەری پارتی و تەرکیزی خەڵکی لەسەر نەهێشت.
دەبوو برادەرانی هیوا وردتر مامەڵەیان لەتەک ئەم دۆسێیەدا بکردایە، هەوڵیان بدایە پشکێکیان لەم دادگایە بۆ هێزەکانی دەرەوەی پارتی و یەکێتی بپچڕیایە. چونکە ئێستا ئەوەی پرسیارە لای خەڵک، چۆن هاوپەیمانیی هیوا داوای گواستنەوەی مووچەی فەرمانبەرانی هەرێم دەکات بۆ سەر بەغداد، بەڵام لەبەرامبەر پشتگوێخستنی ئەنجوومەنی دادوەریی هەرێم لەدانانی ئەندامە کوردەکاندا، هاوشانی پارتی دژی یاسای دادگای فیدراڵی دەوەستێتەوە؟!
لەکاتێکدا هەر برادەرانی هیوابوون رەخنەیان لەوە دەگرت، کە ئەنجوومەنی باڵای دادوەری هەرێم دوو دادوەری حیزبی بۆ ئەنجوومەنی کۆمسیارانی کۆمسیۆنی باڵای ھەڵبژاردن دابنێت، ئایا ئەمە موفارەقە نیە لەکارکردندا؟