سۆرانی  |  بادینی  |  English      

دەرهێنەرێکی سینەمای ئێران لەلایەن باوکییەوە کوژرا

  2021-05-17  | 
 تۆڕی هەواڵی ژیان
دەرهێنەرێکی بەناوبانگی سینەمای ئێران لەلایەن باوکییەوە بەچەقۆ پارچە پارچە کرا و کوژرا.

میدیای ئێران بڵاویکردەوە، رۆژی رابردوو تەرمی بابەک خوڕەمدین دەرهێنەری بەناوبانگی سینەمای ئێران لە ناوچەی ئێکباتانی تاران دۆزراوەتەوە.

ئاماژە بەوەشکراوە، دوابەدوای لێکۆڵینەوە لەو رووداوە، باوک و دایکی بابەک خوڕەمدین دەستگیرکراون و دانیان بە کوشتنی کوڕەکەیاندا ناوە.

ئەوەش خراوەتەڕوو کە لە دانپێدانانەکەدا، باوکی ئەو دەرهێنەرە رایگەیاندووە، بەهۆی ئەوەی ناکۆکی لەگەڵ کوڕەکەی هەبووە، سەرەتا بێهۆشی کردووە و دواتر بە چەقۆ جەستەی پارچە پارچە کردووە.

تاوەکو ئێستا هۆکار و زانیاری زیاتر سەبارەت بە کوشتنی بابەک خوڕەمدین لەلایەن باوکییەوە لەبەردەستدا نییە و دۆسیەکە لە دادگای تاوانەکانی تارانی پایتەخت لێکۆڵینەوەی لەبارەوە دەکرێت.