سه‌رۆكی هه‌رێمی كوردستان و باڵیۆزی ئه‌مریكا له عێراق كۆبوونه‌وه و سه‌رۆكی هه‌رێم رایگه‌یاند: ده‌بێ وه‌ك هه‌رێمێكی فیدڕاڵی مامه‌ڵه له‌گه‌ڵ هه‌رێمی كوردستاندا بكرێت، لە کۆبونەوەکەدا باس لە پرسی موچە و بودجەی هەرێمی کوردستان کراوەو جەختیش لەسەر تەبایی نێوان لایەنە سیاسییەکان کراواتەوە بەتایبەت پارتی و یەکێتی.
سه‌رۆكایه‌تیی هه‌رێمی كوردستان له راگه‌یه‌ندراوێكدا له‌سه‌ر كۆبونه‌وه‌كه ده‌ڵێت: پاشنیوه‌ڕۆی ئه‌مڕۆ دووشه‌ممه نێچیرڤان بارزانی، سه‌رۆكی هه‌رێمی كوردستان، پێشوازی له ئالینا ڕۆمانۆوسكی، باڵیۆزی ئه‌مریكا له عێراق و شاندیكی یاوه‌ری كرد.
دەقی ڕاگەیەندراوەکە...
له كۆبوونه‌وه‌يه‌كدا ده‌رباره‌ى په‌يوه‌ندييه‌كانى ئه‌مه‌ريكا له‌گه‌ڵ عێراق و هه‌رێمى كوردستان، گفتوگۆى چاره‌سه‌ركردنى كێشه‌كانى هه‌ولێر ـ به‌غدا به‌تايبه‌تى پرسى بودجه و مووچه‌ى مووچه‌خۆرانى هه‌رێمى كوردستان و دۆخى عێراق و هه‌رێمى كوردستان، بيروڕايان گۆڕييه‌وه.
هه‌ردوولا جه‌ختيان له گرنگيى گفتوگۆيه‌كى بنياتنه‌رانه له‌نێوان حكوومه‌تى فيدراڵى عێراق و حكوومه‌تى هه‌رێمى كوردستاندا كرده‌وه بۆ لێكگه‌يشتنى هاوبه‌ش و چاره‌سه‌ركردنى كێشه‌كانى نێوانيان، به شێوه‌يه‌ك مافه ده‌ستوورييه‌كانى هه‌مووان ده‌سته‌به‌ر بكات و ئارامى و سه‌قامگيريى سياسيى وڵات بپارێزێت.
سه‌رۆك نێچيرڤان بارزانى داكۆكى له گرنگيى جێبه‌جێكردنى سيستمى فيدراڵى له عێراق كرده‌وه وه‌ك له ده‌ستووردا هاتووه، هه‌روه‌ها ئاماژه‌ى به‌وه كرد كه ده‌بێ وه‌ك هه‌رێمێكى فيدراڵى مامه‌ڵه له‌گه‌ڵ هه‌رێمى كوردستاندا بكرێت و به‌رده‌واميى كێشه و ناكۆكی له‌نێوان حكوومه‌تى فيدراڵيى عێراق و حكوومه‌تى هه‌رێمى كوردستاندا، له به‌رژه‌وه‌نديى وڵاتدا نييه.
هه‌ردوولا هاوڕا بوون له‌سه‌ر گرنگيى چاره‌سه‌كردنى كێشه‌كان و دابينكردنى شايسته دارايييه‌كانى هه‌رێمى كوردستان به‌پێى ياسا و ڕێككه‌وتنه‌كان، هه‌روه‌ها جه‌ختيان له ته‌بايى و يه‌كڕيزيى نێوان لايه‌نه سياسييه‌كانى هه‌رێمى كوردستان، به‌تايبه‌تى پارتى ديموكراتى كوردستان و يه‌كێتيى نيشتمانيى كوردستان كرده‌وه.
ده‌رفه‌ته‌كانى سه‌رمايه‌گوزارى و وه‌به‌رهێنانى بيانى و ناوخۆيى و به‌هێزكردنى كه‌رتى تايبه‌ت له عێراق و هه‌رێمى كوردستان، دۆخى ئێزدييان و گرنگيى جێبه‌جێكردنى ڕێككه‌وتنى حكوومه‌تى هه‌رێمى كوردستان و حكوومه‌تى فيدراڵيى عێراق بۆ ئاساييكردنه‌وه‌ى دۆخى شه‌نگال و پێشهاته‌كانى ناوچه‌كه به‌گشتى، ته‌وه‌رێكى ديكه‌ى كۆبوونه‌وه‌كه بوو.