ژووری ئۆپەراسیۆنی پارێزگای هەولێر بەچەند مەرجێک بڕیاریدا بەکردنەوەی نۆرینگە پزیشکییەکان.
ژووری ئۆپەراسیۆنی پارێزگای هەولێر لە راگەیەندراوێکدا بڵاویکردەوە، سەبارەت بە نۆڕینگە و سەنتەر و کۆمەڵگا پزیشکیەکانی سنووری پارێزگای هەولێر، لەبەر دۆخی تەندروستی و پێداویستی خەڵک، ژووری ئۆپەراسیۆنی پارێزگای هەولێر بەڕاوێژ لەگەڵ وەزارەتی تەندروستی و وەزارەتی ناوخۆی حکومەتی هەرێمی کوردستان، بڕیاریدا بەکردنەوەیان، بەو مەرجانەی خوارەوە :-
یەکەم/ کردنەوەی نۆڕینگە و سەنتەر و کۆمەڵگا پزیشکیه‌کان ئارەزوومەندانەیە .
دووەم/ لە هۆڵی چاوەڕوانی نابێت لە چوار نەخۆش زیاتری لێبێت و نێوانی هەر یەکەکیان لە دوومەتر کەمتربێت .
سێیەم/ پزیشک دەبێت دەستکێشی لەدەستبێ و ماسک ببەستێ .
چوارەم/ نەخۆش نابێت لە یەک هاوەڵ زیاتری لەگەڵ بێ و دەبێت هەردوکیان ماسکیان بەستابێ .
پێنجەم/ ڕۆژانە نۆرینگە و سەنتەر و کۆمەڵگا پزیشکیەکان تەعقیم بکرێت .
شەشەم/ ڕۆژانە نابێت له ١٥ نەخوش زیاتر ببینرێت .
ئەم بڕیارەی ژووری ئۆپەراسیۆنی پارێزگای هەولێر دوای ئەوە دێت کە وەزارەتی ناوخۆی هەرێم دەسەڵاتی تەواوی دا بە سەرجەم پارێزگا و ئیدارە سەربەخۆکان بۆ کردنەوی نۆرینگە پزیشکییەکان بەپێی رێنماییە تەندروستییەکان.